Məlumat üçün bildirək ki, jurnalist Dövlət Sərhəd Xidmətinin rəisi Elçin Quliyevə yaxınlaşaraq helikopterin qəzaya uğraması ilə bağlı faciəyə münasibət bildirməyə çalışıb. Lakin mayor Rövşən Cahangirov müxbiri kobud şəkildə itələməyə başlayıb, prosesi lentə alan operatoru isə yumruqla vurub.

Mövzu ilə bağlı Sfera.az-a danışan media məsələləri üzrə ekspert, hüquqşünas Ələsgər Məmmmədli jurnalistin fəaliyyətinə zor tətbiq etməyin cinayət məsuliyyəti yaratdığını bildirib:

"Peşə fəaliyyətini yerinə yetirən jurnalistə qarşı heç kim qanundan və etikadan kənara çıxmamalıdır. Jurnalist qanuni olaraq peşə fəaliyyətini icra edir və onun fəaliyyəti konstitusion təminat altındadır. Jurnalistin qanuni peşə fəaliyyətinə qarşı tədbir görmək, zor tətbiq etmək cinayət məsuliyyəti yaradır. Cinayət Məcəlləsinin 163-cü maddəsində göstərilir ki, qanuni peşə fəaliyyətinə mane olmaq zor tətbiqi ilə baş verirsə, bu cinayət əməlidir”.

 

"Zabit heyətinin qəza nəticəsində dünyasını dəyişməsi ictimai əhəmiyyət daşıyır və təbii olaraq cəmiyyət bu istiqamətdə informasiya ilə təmin olunmalıdır. Jurnalist də cəmiyyətin ehtiyacından orada idi. Buna uyğun olaraq da media mənsubuna münasibət göstərilməli, adekvat cavab verilməli idi. Tərbiyə sərhədini aşan, etik olmayan mənzərə ortaya çıxmamalı idi. Buna görə zor tətbiq edən həmin  məsul şəxs vəzifədə qalmamalıdır. Məsələ ilə bağlı 163-cü maddə ilə prokurorluq orqanları ayrıca iş başlatmalıdır”.