"Nikoil Bank" Baş Prokurorluğa minnətdarlığını bildirir - AÇIQLAMA

"Nikoil Bank"sabiq işçilərinin işi üzrə istintaqın müvəffəqiyyətlə başa çatması ilə əlaqədar Baş Prokurorluğa öz minnətdarlığını bildirir

 

"Nikoil Bank”, Sumqayıt filialının vəzifəli şəxslərinin qanunsuz əməlləri barədə daxil olmuş materialın Baş prokuror yanında Korrupsiyaya qarşı Mübarizə Baş İdarəsində araşdırılması və vəzifəli şəxslərin həbs olunması xəbərilə bağlı açıqlama yayıb.

 

Bankdan Sfera.az-a daxil olmuş açıqlamada deyilir:

 

"2016-cı ildə daxili istintaq zamanı "Nikoil Bank” tərəfindən Sumqayıt filialının bəzi sabiq işçilərinin fəaliyyətində qanun pozuntularını aşkar olunmuşdu. "Nikoil Bank" sabiq işçilərinə qarşı cinayət işinin açılması ilə bağlı Azərbaycan Respublikasının Baş prokuroru yanında Korrupsiyaya qarşı Mübarizə Baş İdarəsinə xahiş ilə müraciət etmişdi.

 

Bugün Baş Prokurorluq tərəfindən bu işin gedişatı ictimaiyyətə açıqlandı və rəsmi bəyanatda istintaqın nəticələri yayımlandı. "Nikoil Bank" bu istintaqın uğurla başa çatması ilə əlaqədar  Baş prokuroru yanında Korrupsiyaya qarşı Mübarizə Baş İdarəsinin əməkdaşlarına öz minnətdarlığını bildirir.

 

2016-cı ildən etibarən "Nikoil Bank"ın yeni rəhbərliyi daxili proseslərdə islahatların həyata keçirilməsilə  müasir idarəetmə proseslərini tətbiq etdi. Bank xidmətlərinin göstərilməsində rəqəmsal transformasiyanı həyata keçirən Nikoil Bank artıq yeni inkişaf mərhələsinə keçid alıb”.

 

RÜŞVƏT ALIB, PUL MƏNİMSƏYİBLƏR

 

Baş Prokurorluğun Mətbuat xidmətinin ayydığı açıqlamada bildirilir ki, həyata keçirilmiş istintaq-əməliyyat tədbirləri nəticəsində filialın müdiri Ruslan Talıbovun filialın digər vəzifəli şəxsləri Vüsal Qasımov, Nazim İsmayılov və Elşən Xıdırov ilə qabaqcadan əlbir olub vəzifə səlahiyyətlərindən sui-istifadə edərək heç bir biznes fəaliyyətlərinin olmadığını, veriləcək krediti biznes fəaliyyətinə sərf etməyəcəklərini və bununla əlaqədar kredit ödənişlərinin müqavilə şərtlərinə uyğun ödənilməsində problemlərin yaranacağını bildikləri halda, banka müraciət etmiş ayrı-ayrı şəxslərə 868 min manat məbləğində qanunsuz pul kreditinin verilməsinə görə onlardan 122 min manat pulu və digər əmlakı rüşvət kimi təkrarən istəyərək almalarına, həmçinin vəzifə saxtakarlığı edərək bankın işçilərinə məzmununda yalan məlumatlar olan biznes kreditinin rəsmiləşdirilməsinə nail olaraq bankın onlara etibar edilmiş 192 min manat məbləğində vəsaitini mənimsəmələrinə şübhələr üçün əsaslar olduğundan fakta görə cinayət işi başlayıb.

 

Bundan başqa, istintaqın gedişində qeyd olunan vəzifəli şəxslərin dələduzluq edərək vətəndaşların kredit ilə aldıqları 451 min məbləğində olan əmlaklarını və nağd pul vəsaitlərini kreditin ödənişinə yönləndirəcəkləri adı ilə aldadaraq ələ keçirdiklərinə dair şübhələr müəyyən olunub.

 

Qeyd edilən vəzifəli şəxslər Cinayət Məcəlləsinin 178.3.2 (külli miqdarda dələduzluq), 179.3.2 (külli miqdarda mənimsəmə və ya israf etmə), 308.2 (vəzifə səlahiyyətlərindən sui-istifadə), 311.3.2 (təkrar rüşvət alma) və 313-cü (vəzifə saxtakarlığı) maddələri ilə ittiham elan olunmaqla R.Talıbov, V.Qasımov və E.Xıdırov barəsində məhkəmənin qərarı ilə həbs, N.İsmayılov barəsində isə polisin nəzarəti altına vermə qətimkan tədbirləri seçilib.

 

Hazırda cinayət işi üzrə qeyd olunan qanunsuz halların tam, hərtərəfli araşdırılmaqla təqsirli şəxslərin dairəsinin tam müəyyənləşdirilərək məsuliyyətə cəlb edilmələri istiqamətində zəruri istintaq-əməliyyat tədbirləri davam etdirilir.