SOCAR qlobal səhnədə: ABŞ nəhəngi ilə ortaqlıq başlayır
"SOCAR ilə "ExxonMobil" arasında imzalanan əməkdaşlıq memorandumu həm Azərbaycanın enerji strategiyası, həm də dünya enerji bazarlarında mövqeyi baxımından ciddi strateji və maliyyə nəticələri vəd edir".
Sfera.az Musavat-a istinadən xəbər verir ki, bu barədə iqtisadçı Eyyub Kərimli deyib.
İqtisadçı qeyd edib ki, avqustun 7-də Vaşinqtonda Prezident İlham Əliyevin iştirakı ilə imzalanan bu sənəd Azərbaycanın enerji diplomatiyasında yeni mərhələnin başlanğıcını göstərir:
"Mərasimdə ABŞ prezidentinin xüsusi elçisi Stiv Uitkoffun iştirakı bu əməkdaşlığın təkcə korporativ deyil, həm də strateji-siyasi əhəmiyyət daşıdığını göstərir.
"ExxonMobil" dünyanın ən böyük və ən nüfuzlu enerji şirkətlərindən biridir. Onunla əməkdaşlıq yalnız texnoloji və maliyyə dəstəyi deyil, eyni zamanda beynəlxalq enerji bazarlarında geosiyasi çəki deməkdir.
"ExxonMobil" ilə əməkdaşlıq SOCAR-a dərin qazma, neft-kimya texnologiyaları və alternativ enerji sahələrində texniki biliklər və təcrübə qazandıracaq. Bu, xüsusilə dəniz yataqlarının işlənməsi və karbonsuz texnologiyalara keçid baxımından önəmlidir.
"ExxonMobil"in sərmayəsi SOCAR-ın iri enerji layihələrində maliyyə yükünü bölüşdürməyə imkan verəcək. Azərbaycanın enerji sektoruna xarici kapital axını artır ki, bu da dövlət büdcəsinə və Neft Fonduna gəlirləri artırır.
Yüksək riskli layihələrdə "ExxonMobil" kimi tərəfdaş şirkətin iştirakı SOCAR üçün kommersiya risklərini azaldır. Bundan sonra digər transmilli şirkətlərin Azərbaycana marağı da arta bilər (məsələn, "Chevron", BP-nin yeni istiqamətləri və s.).
"ExxonMobil" ilə əməkdaşlıq Azərbaycanın Avropa və Asiya bazarlarında etibarlı tərəfdaş statusunu gücləndirir. Bu, xüsusilə "yaşıl enerji keçidi" dönəmində təmiz texnologiyaların tətbiqində önəm daşıyır.
ABŞ-la strateji enerji əməkdaşlığı Azərbaycanın transatlantik enerji dialoqunda yerini möhkəmləndirir. Regionda Azərbaycanın geosiyasi əhəmiyyəti artır, çünki Qafqazda sabit enerji axını Qərb üçün kritik əhəmiyyət daşıyır.
"ExxonMobil" ilə imzalanan memorandum Azərbaycanın enerji sektorunda yeni mərhələyə keçidini simvolizə edir – bu, sadəcə birgə layihə deyil, ölkənin iqtisadi, texnoloji və geosiyasi gələcəyini formalaşdıracaq strateji platformadır.
Bu cür əməkdaşlıqlar SOCAR-ı regional oyunçudan qlobal enerji tərəfdaşına çevirə bilər. Azərbaycanın enerji siyasətində ABŞ ilə sıx əməkdaşlıq eyni zamanda Avropa və Asiya bazarlarında etibarlı, balanslı və çevik mövqe təmin edəcək".
