ABŞ administrasiyası Rusiyadan neft alan ölkələrə qarşı sanksiyalar tətbiq etməyə hazırlaşır. Sanksiyaların hədəfində əsasən Çin və Hindistanın olduğu bildirilir. Amerikanın tətbiq edəcəyi sanksiyalardan sonra bu iki ölkənin Rusiya ilə enerji əməkdaşlığını davam etdirib-etdirməyəcəyi müzakirə mövzusuna çevrilib.

Məsələ ilə bağlı Sfera.az-a açıqlama verən politoloq Elman Vəliyev bildirib ki, dünyada neft ixrac edən ölkələrin sayı məhduddur və Rusiya enerji ehtiyatlarına görə qlobal bazarda mühüm rol oynayır:

“Dünyada neft ixrac edən ölkələrin sayı çox deyil. Məsələn, Venesuela neft ehtiyatına görə ön sıralarda olsa da, onu sata bilmir. Buna görə də Rusiyanın neft və qazına bir çox ölkə möhtacdır. Trampın planlaşdırdığı sanksiyalarla Rusiyanın sarsıdılacağını düşünmürəm”.

Politoloq xüsusilə Hindistan və Çin kimi ölkələrə bu yolla təsir edilməsinin çətin olduğunu bildirdi:

“Çin və Hindistan həm Şanxay Əməkdaşlıq Təşkilatının, həm də BRİKS-in üzvüdürlər. Hazırda bu üçlük arasında koalisiya formalaşıb və bu ittifaq Amerika və NATO-ya qarşı təhlükəsizlik təminatı kimi çıxış edir. Bu baxımdan inanmıram ki, ABŞ-nin sanksiyalarına görə onlar Rusiya neftindən imtina etsinlər”.

Ekspert həmçinin qeyd edib ki, Rusiya üçün alternativ bazarlar kifayət qədərdir. Əgər Rusiyanın bütün tərəfdaşlarını itirsə belə, Afrika bazarı belə onun üçün yetərlidir.

E.Vəliyevin sözlərinə görə, ABŞ Prezidenti Donald Trampın bu addımlarının arxasında daha çox imic siyasətinin dayandığını deyib:

“Tramp çalışır ki, özünü dünyada sülh yaradan bir lider kimi təqdim etsin. Bəlkə də bu niyyətlə Nobel Sülh Mükafatına namizəd olmaq istəyir”.

Bəsti Rəfizadə
Sfera.az

Trampın enerji sanksiyaları: Çin və Hindistan geri çəkiləcəkmi?