Şüvəlanda 5 milyon manata villa satılır - FOTOLAR

Bakının Qala–Şüvəlan yolu istiqamətində, 60 sotluq geniş torpaq sahəsində yerləşən, fərdi memarlıq layihəsi əsasında inşa olunmuş lüks villa 5 milyon manata satışa çıxarılıb.

Sfera.az Teleqraf-a istinadən xəbər verir ki, ümumi sahəsi 2 060 kvadratmetr olan bağ evinin bir kvadratmetrinə düşən dəyəri 2 427 manat təşkil edir.

Villa qismən əşyalı (dünyaca məşhur brendlərin mebelləri və avadanlıqları ilə təchiz edilib) şəkildə satılır. Tikili 4 mərtəbəlidir və 14 otaqdan ibarətdir. Yarımzirzəmi mərtəbəsində geniş zal, iri mətbəx, anbar, sanitar qovşaqlar və köməkçi otaq yerləşir. Birinci mərtəbədə 220 kv.m-lik zal, mətbəx, yataq otağı, qarderob otağı, namaz otağı, antresol və qapalı hovuz otağı mövcuddur. İkinci mərtəbədə hər biri şəxsi sanitar qovşağa malik 5 yataq otağı, əlavə qarderob otaqları və böyük zal yer alır. Mansard mərtəbəsi isə açıq planlı sahə, əlavə otaqlar və 230 kv.m-lik geniş terrasdan ibarətdir.

Həyətyanı sahədə 260 kv.m sahəsi olan 2 mərtəbəli mühafizəçi binasında qaraj, qazanxana, yaşayış otaqları və mətbəx yerləşir. Həmçinin, həyətdə təmirsiz, lakin tam tikilib başa çatdırılmış geniş mətbəx də var.

Əmlakın torpaq və tikili üzrə çıxarışı (kupçası) mövcuddur. Torpaq sahəsinin çıxarış üzrə ölçüsü 48 sot təşkil edir. Satış məbləğin 30–40%-lik hissəsi əmlakla barter yolu ilə qəbul oluna bilər. Elanda qeyd edilənə görə, real alıcı ilə qiymətə dair razılaşma mümkündür.