Neft ucuzlaşacaq ? - Səkkiz ölkə neft hasilatını artıracaq
Neft İxrac Edən Ölkələr Təşkilatının (OPEC+) səkkiz üzvü — Rusiya, Səudiyyə Ərəbistanı, İraq, BƏƏ, Küveyt, Qazaxıstan, Əlcəzair və Oman - avqustun 3-də keçirilən iclasda sentyabr ayından etibarən neft hasilatını gündəlik 548 min barel artırmaq barədə razılığa gəliblər.
Sfera.az “Bloomberg”ə istinadən xəbər verir ki, OPEC+ ölkələri arasında hasilatın tənzimlənməsi ilə bağlı 2024-cü ilin sonunda əldə edilən razılaşma 2026-cı ilin sentyabrında qüvvədən düşəcək.
2024-cü il razılaşmasına əsasən, ölkələr gündəlik hasilatı ümumilikdə 2,2 milyon barel azaldıblar. İndi isə bu razılaşmanın müddəti bitmədən 8 ölkə hasilatı gündəlik 548 min barel artırmağı planlaşdırır.
Məlumata görə, gündəlik hasilat Səudiyyə Ərəbistanında 9,978 milyon barelə, Rusiyada 9,449 milyon barelə, İraqda 4,22 milyon barelə, BƏƏ-də 3,375 milyon barelə, Küveytdə 2,548 milyon barelə, Qazaxıstanda 1,55 milyon barelə, Əlcəzairdə 959 min barelə və Omanda 801 min barelə qədər artırılacaq.
“Financial Times” analitiklərinin fikrincə, sentyabr artımından sonra qışa qədər bazarda neft artıqlığı yarana bilər. Xüsusilə Fransanın "TotalEnergies" şirkəti bu barədə xəbərdarlıq edib.
Qəzet qeyd edir ki, neft artıqlığı qiymətlərin aşağı düşməsinə səbəb ola bilər. Lakin əgər Donald Tramp vəd etdiyi kimi Rusiyadan neft alan ölkələrə sanksiya tətbiq edərsə, bu halda qiymətlərin sabitləşməsi ehtimalı da var.
Vasif
