“Son illərdə daşınmaz əmlakın bahalaşması nəticəsində vətəndaşların topladığı kapital onların mənzil ala bilməsinə kifayət etmir. Qiymətlərin bazarda orta hesabla illik 12–15% artması ipoteka ilə mənzil əldə etməyi həm sərfəli, həm də investisiya baxımından daha cəlbedici edib. Bu səbəbdən də ipoteka müraciətlərinin sayı son illərdə əhəmiyyətli dərəcədə artıb və bu tendensiyanın davam edəcəyi gözlənilir”.

Bunu Sfera.az saytına açıqlamasında daşınmaz əmlak eksperti Elnur Azadov bildirib.

Ekspert ipoteka ilə alınan mənzillərin orta hesabla 15 il ərzində təkrar bazara çıxmadığından, bazarda bu seqmentə aid mənzillərin sayının azaldığını dedi.

E.Azadov ipoteka kreditlərindən əsasən yüksək gəlirli insanların istifadə etdiyini də vurğuladı:

"Niyə bəzi vətəndaşlara 150 min manat kredit ayrılır? Maddi imkanı yüksək olan şəxslər bu vəsaitdən tam şəkildə yararlanır, imkanı məhdud olanlar isə cəmi 10–50 min manatlıq kredit əldə edə bilirlər. Beləliklə, imkanlı şəxslər üç dəfə artıq dəstək alır, halbuki əslində daha çox ehtiyacı olanlara daha böyük dəstək göstərilməlidir.
Əgər İpoteka Fondu ildə, məsələn, 300 mənzili yüksək məbləğlərlə maliyyələşdirmək əvəzinə, daha aşağı kreditlərlə daha çox mənzili dəstəkləsəydi, iki-üç dəfə artıq vətəndaş ipoteka sistemindən yararlana bilərdi. Bu da daha çox Azərbaycan vətəndaşının mənzil sahibi olmasına şərait yaradardı. Hələlik bu istiqamətdə hansı addımların atılacağı məlum deyil”.

Fidan Hacızadə
Sfera.az

İpoteka kreditindən yüksək gəlirli şəxslər yararlanır - Ekspert