Azərbaycanda virtual pul olacaq - Qanun layihəsi hazırlanır
Son illərdə dünya üzrə kriptovalyutalara maraq sürətlə artır. Rəqəmsal iqtisadiyyatın inkişafı fonunda bu sahənin tənzimlənməsi və kriptovalyutaların hüquqi statusu bir çox ölkələrin gündəmindədir. Azərbaycanda da bu istiqamətdə addımlar atılır.
Bəs kriptovalyutalar ölkəmizdə rəsmi ödəniş vasitəsi kimi tanına bilərmi? Rəqəmsal manatın tətbiqi nə vaxt reallaşacaq?
Sfera.az xəbər verir ki, mövzu ilə bağlı danışan Azərbaycan İnternet Formunun prezidenti Osman Gündüzün sözlərinə görə, bu barədə qanun hazırlanır.
“Ötən gün Mərkəzi Bankın sədri Taleh Kazımovun ekspertlərlə görüşundə mənim diqqət yetiridyim məsələlərdən biri də virtual aktivlərlə (kriptovalyuta, tokenlər, NFT və s.), kriptovalyuta bazarının tənzimlənməsi ilə bağlı olub. Mərkəzi Bank sədri virtual aktivlərlə bağlı qanunun hazırlanmaqda olduğunu və qısa müddətdə başa çatdırılacağını bildirdi. Bu qanun ölkəmizdə kriptovalyuta mühitini xeyli dəyişəcək. Məhz bu qanun kripto birjaların və bu tip platformaların qeydiyyatı və xarici kripto-platformaların Azərbaycanda fəaliyyəti üçün mühitin yaradılması, kriptoların rəsmi pul vahidi və ya ödəniş vasitəsi kimi tanınması, kriptovalyutalardan əldə olunan gəlirlərin vergiyə cəlb edilməsi və s. bu tip məsələləri tənzimləyəcək”.
O.Gündüz xatırladıb ki, MDB məkanında Rusiyada, Qazaxıstanda, Özbəkistanda və Belarusda bu sektorun tənzimlənməsi ilə bağlı qanunlar və hüquqi normalar mövcuddur.
Mütəxəssis qeyd edib ki, Mərkəzi Bank rəqəmsal manata daha fərqli və daha konservativ yanaşır:
“Taleh müəllimin dediyindən belə anladım ki, rəqəmsal manatın dövriyyəyə buraxılmasına virtual aktivlər çərçivəsində deyil, daha məhdud çərçivədə baxılır. Hazırda Mərkəzi Bank digər ölkələrdə rəqəmsal milli valyutalarla bağlı mövcud təcrübənin araşdırılması və öyrənilməsilə də məşğuldur. Gələn il rəqəmsal manatla bağlı işlərin daha da sürətlənəcəyi gözlənilir”.
Firuzə Əliyeva
Sfera.az
