Ailələrin istehlak xərci 2500 manata çatıb - Hesablama

Azərbaycan əhalisinin 2025-ci ilin birinci yarısında istehlak məqsədilə xərclədiyi vəsaitlərin məbləğində artım davam edib. Artımdan sonra orta statistik bir ailənin (4 nəfərlik) aylıq xərcləri 2500 manata çatıb. 

Sfera.az rəsmi dövlət statistikasına istinadən xəbər verir ki, 2025-ci ilin ilk yarısı ərzində bir istehlakçı orta hesabla ayda 614,8 manat pul xərcləyib. 

2024-cü ilin eyni dövrü ilə müqayisə etdikdə məlum olur ki, bu il xərclər adambaşına 56,9 manat artıb. Dörd nəfərlik ailənin xərclərindəki artım isə 227,6 manat olub. 
2024-cü ilin birinci yarısında orta statistik bir ailə ay ərzində orta hesabla 2232 manat xərclədiyi halda bu ilin eyni dövründə ay ərzində xərclər 2460 manata yüksəlib. 

Bəs əhali pulunu nələrə xərcləyir?

Əhalinin istehlak xərcləri 3 hissədən ibarətdir. 

Ən çox vəsait ərzaq mallarının alınmasına sərf edilir. Bir ölkə sakini ayda orta hesabla 264,9 manatlıq, bir ailə 1060 manatlıq ərzaq məhsulları, içkilər və tütün məmulatları alıb. 

Xərclərdə ikinci ən çox paya qeyri-ərzaq malları sahibdir. Qeyri-ərzaq mallarının alınmasına ayda 217,9 manat xərclənib. Ailənin bu növ xərci isə 871,6 manat təşkil edib.

Xərclərin böyüklüyünə görə üçüncü sırada pullu xidmətlər qərarlaşıb. Əhalinin bir fərdinə düşən aylıq pullu xidmətlər xərci 132 manat, ailənin xərci isə 528 manat olub. 

Vasif