Enerjiyə sərmayələr azalır, kapital süni intellektə yönəlir - IEA-dan xəbərdarlıq
Beynəlxalq Enerji Agentliyinin (IEA) “Dünya Enerji İnvestisiyaları” hesabatına görə, enerji sektorunda artan xərclər və siyasət qeyri-müəyyənlikləri investisiyaları zəiflədir, kapital daha çox süni intellekt sahəsinə yönəlir.
Sfera.az türk mediasına istinadən xəbər verir ki, 2024-cü ildə enerji ilə bağlı vençur kapitalı investisiyaları 8 milyard dollar azalsa da, süni intellektə yatırılan sərmayə 84 milyard dollara çatıb. Bu, enerji sektorundakı göstəricidən üç dəfə çoxdur.
Çin şirkətləri 2025-ci ilə qədər qlobal enerji xərclərinin 38%-ni təşkil edəcək və bu göstərici ilə Avropanı geridə qoyacaq. Dövlət və özəl sektorun inteqrasiyası Çində təmiz enerji texnologiyalarında üstünlük yaradıb.
Enerji sektorunda araşdırma və inkişaf etdirmə sahələrinə çəkilən xərclərə görə, şirkətlərin sıralamasında dəyişiklik baş verib. Çinli “CATL”, “BYD” və “Tesla” kimi elektrikli nəqliyyat və akkumulyator istehsalçıları siyahıya daxil olub. Neft-qaz sahəsində isə “PetroChina”, “Sinopec” və “Saudi Aramco” mövqelərini qoruyub saxlayıblar.
Fidan Hacızadə
Sfera.az
