Sülhün qiyməti: Rusiya və Ukrayna razılaşsa, bu məhsullar ucuzlaşacaq
Rusiya ilə Ukrayna arasında mümkün atəşkəs yalnız hərbi-siyasi baxımdan deyil, həm də iqtisadi və ticari sahədə ciddi nəticələrə səbəb ola bilər. Proqnozlara görə atəşkəs əldə olunarsa, bu, qlobal əmtəə bazarlarında qiymətlərə təsir edəcək. Ehtimal edilir ki, sülh bəzi məhsulların dəyərini artıracaq, bəzilərini isə ucuzlaşdıracaq.
Bəs Rusiya Ukraynaya arasında atəşkəs olarsa hansı məhsuların qiymətində dəyişiklik görəcəyik?
Sfera.az-a açıqlama verən iqtisadçı Natiq Cəfətli hesab edir ki, Rusiya ilə Ukrayna arasında yalnız atəşkəsə görə əmtəə qiymətlərində ciddi dəyişiklik olmayacaq.
Onun sözlərinə görə, qiymət dəyişiklikləri üçün yalnız atəşkəsin elan olunması kifayət deyil: “Ticarət əlaqələrinin bərpası, istehsal və logistika imkanlarının yenidən açılması da iqtisadi proseslərə ciddi təsir edə bilər.
Ən azından bu vəziyyət enerji daşıyıcılarının qiymətlərinə təsir göstərəcək. Çünki regionda risklərin aradan qalxması fonunda enerji bazarlarında müəyyən ucuzlaşmalar müşahidə oluna bilər”.
İqtisadçı bundan əlavə, bu halın kənd təsərrüfatı məhsulları bazarına da müsbət təsir gözləniləcəyindən bəhs edib.
O qeyd edib ki, həm Rusiya, həm də Ukrayna bu sahədə əsas istehsalçı və ixracatçılardır:
“Onların qlobal bazara çıxışı asanlaşdıqca, bu məhsullarda da qiymətlərin ucuzlaşması istiqamətində müsbət dinamika formalaşa bilər”.
Qərb analitiklərinin fikrincə isə adıçəkilən məhsullarla yanaşı qızılın dəyərində və yükdaşımaların qiymətində dəyişiklik olacaq. Onların şərhinə əsasən, müharibə dayanarsa və problemin siyasi yollarla həlli ehtimalı artarsa qızıl bir müddət ucuzlaşacaq. Çünki qızıl məhz bu müharibə ilə əlaqədar kəskin şəkildə bahalaşıb.
Qızılla yanaşı yolların açılması hesabına yük daşımaların da dəyərinin aşağı düşəcəyi proqnozlaşdırılır.
Fidan Hacızadə
Sfera.az
