Süni intelekt inkişaf etsə də hələ 3 peşənin tətbiqində insana ehtiyac olacaq.

Sfera.az xəbər verir ki, bu fikirləri “Microsoft”un qurucusu Bill Qeyts “The Indian Express” nəşrinə verdiyi müsahibədə bildirib.

Qeytsin fikrincə, süni intellekt bir çox sənaye sahəsində insan əməyini əvəz etsə də, bəzi peşələr insan ağlına və qərarvermə qabiliyyətinə möhkəm şəkildə bağlıdır.
Süni intelektin əvəz edə bilməyəcəyi əsas peşə kodlaşdırmadır.

Qeytsin fikrincə, kodlaşdırmanın olması insansız mümkün deyil.

Bill Qeyts qeyd edib ki, süni intellekt kod yazmaq sahəsində irəliləyiş göstərsə də, proqramçılar və proqram təminatı mühəndisləri gələcəkdə də vacib olacaq:

“AI müəyyən kodları yaza bilir, lakin insan kimi dəqiqliklə və yaradıcı yanaşma ilə kod yazmaq qabiliyyətinə hələ sahib deyil. Proqramçılar kodları təkmilləşdirmək, düzəltmək və inkişaf etdirmək üçün əvəzolunmaz qalacaqlar”.

Qaytsin vurğuladığı ikinci peşə qrupu enerji sahəsi üzrə mütəxəssislərdir. O bildirib ki, bu sahədəki sistemlər çox mürəkkəbdir və strateji qərarların qəbulunda insan müdaxiləsi əsas rol oynamağa davam edəcək:

“Enerji infrastrukturunu başa düşmək və düzgün yönəltmək üçün yüksək səviyyədə düşünmə və analiz bacarığı tələb olunur ki, bu da hələ ki, süni intellektin sahəsi deyil”.

Üçüncü və sonuncu peşə qrupu isə bioloqlardır. Qeytsə görə, süni intellekt böyük verilənləri təhlil edə bilsə də, yeni elmi nəzəriyyələr irəli sürmək və fərziyyələr formalaşdırmaq qabiliyyətindən uzaqdır:

“Süni intellekt məlumatları işləyir, amma yenilik yaratmaq, fərqli düşünmək, elmi fərziyyələr irəli sürmək insan beyninin sahəsidir. Bu baxımdan, bioloqların rolu hələ də dəyişməz qalacaq”.

Bill Qeytsin bu açıqlamaları süni intellektin sürətlə inkişaf etdiyi bir dövrdə təhlükəsiz peşə seçimləri axtaranlar üçün önəmli siqnaldır. O, insan yaradıcılığı, strateji düşüncə və elmi araşdırma bacarıqlarının hələ uzun müddət AI tərəfindən əvəz edilə bilməyəcəyini vurğulayıb.

Bəsti Rəfizadə
Sfera.az

“Süni intellekt 3 peşəni əvəz edə bilməyəcək” - Bill Qeyts