ABŞ və Çin tarifləri endirəcək - Danışıqlar başlayır

Donald Tramp administrasiyası Çinə qarşı tətbiq etdiyi yüksək idxal rüsumlarını azaltmaq istəyir. Bu məqsədlə mayın 9-da ABŞ və Çinin yüksək səlahiyyətli nümayəndələrinin görüşü planlaşdırılır. 

Sfera.az "Bloomberg"ə istinadən xəbər verir ki, qarşılıqlı şəkildə tətbiq edilən yüksək idxal rüsumları hər iki ölkənin iqtisadiyyatına mənfi təsir etməyə başlayıb.

Bunu nəzərə alaraq tərəflər daha uyğun tariflərlə razılaşmaq üçün görüşəcəklər. 

Görüşdə ABŞ-ni maliyyə naziri Skott Bessent, Çini isə Baş nazirin müavini He Lifenq təmsil edəcək. Bu gün Cenevrədə başlayacaq danışıqlarda ABŞ tərəfi ilk addım kimi idxal rüsumlarını 60 faizdən aşağı salmağı təklif edəcək. 

İki gün davam edəcək danışıqlarda irəliləyiş əldə olunarsa, bu azalmalar gələn həftədən tətbiq olunmağa başlaya bilər. Mənbələr danışıqların ilkin xarakter daşıyacağını və hər iki tərəfin üzləşdiyi çoxsaylı problemlərin həlli yollarını tapmaqdan daha çox şikayətlərin səsləndirilməsinə yönələcəyini bildirib.

Mənbələr əlavə edib ki, vəziyyət qeyri-müəyyəndir və yaxın perspektivdə gömrük rüsumlarının azaldılması qeyri-müəyyəndir. ABŞ-nin əsas tələbləri arasında maqnit istehsalında istifadə edilən nadir torpaq elementlərinə Çin tərəfindən qoyulan ixrac məhdudiyyətlərinin aradan qaldırılmasıdır. 

Vasif
Sfera.az