Ailə başçısı qadın olanda xərclər artır - Müqayisə

Ev təsərrüfatlarının tədqiqi göstərir ki, Azərbaycanda ailə başçısı qadın olduqda adambaşına düşən istehlak xərcləri təxminən 4 faiz artır. 

Sfera.az Dövlət Statistika Komitəsinə istinadən xəbər verir ki, ev təsərrüfatlarında ay ərzində adambaşına düşən xərc başçı kişi olduqda 361 manat, qadın olduqda isə 376 manat təşkil edib.

Qadın başçı olduqda aylıq xərclər adambaşına orta hesabla 15 manat artır. 

Bəs qadın başçı olduqda hansı xərclərdə artım, hansılarında isə azalma baş verir?

Tədqiqat göstərir ki, qadın başçı olduqda daha çox ərzaq məhsullarına çəkilən xərc artır. Ərzaq xərcləri 11 manat artaraq adambaşına 167 manatı ötür. 

Digər xərclərdən səhiyyə xərcləri 2,2 manat artaraq 20,8 manata, paltara xərclənən pul 1,5 manat artaraq 22,4 manata, komunala çəkilən xərc 1,4 manat artaraq 29,8 manata, ev əşyalarına çəkilən xərc 1,3 manat artaraq 28,7 manata, mehmanxana, kafe və  restoran xidmətlərinə çəkilən xərc 1,1 manat artaraq 26,5 manata yüksəlib. 

Qadın başçı olduqda bəzi xərclər azalır. O cümlədən alkoqollu içkilərə, tütün məmulatlarına, nəqliyyat xidmətinə çəkilən xərclərdə azalma baş verir. 

Vasif

Sfera.az