Şimal-Cənub dəhlizi əlavə imkanlar yaradacaq - "İstehsala güclü təkan verəcək”
Aprelin 28-də Bakıda Azərbaycan-İran biznes-forumunda çıxışı zamanı Azərbaycan Prezidenti İlham Əliyev Şimal-Cənub nəqliyyat dəhlizi haqqında danışıb.
İlham Əliyev qeyd edib ki, Azərbaycan və İran, eyni zamanda, önəmli beynəlxalq layihələrdə iştirak edir, o cümlədən Şimal-Cənub nəqliyyat dəhlizi üzrə sıx əməkdaşlıq edir. Bu nəqliyat dəhlizinin əhəmiyyətindən danışan prezident söyləyib ki, Azərbaycan Şimal-Cənub layihəsinin sadəcə nəqliyyat dəhlizi kimi görmür:
"Biz istəyirik ki, bu, sadəcə, nəqliyyat dəhlizi olmasın, həm Azərbaycan, həm də İran ərazisində yol boyunca yeni bizneslərin açılması, yeni sənaye müəssisələrinin yaradılması üçün imkan yaratsın. Bunun üçün kifayət qədər imkanlar var".
Prezident İlham Əliyevin bu fikirlərini Sfera.az-a şərh edən Milli Məclisinin IV çağırış deputatı, iqtisad elmləri doktoru, professor Rüfət Quliyev qeyd edib ki, iqtisadi inkişaf üçün nəqliyyat infrastrukturunun olması vacibdir:
"İqtisadi inkişaf qonşularla normal iqtisadi əlaqələr qurmaqdan, onları inkişaf etdirməkdən keçir və bu baxımdan yol iqtisadiyyatın ən vacib elementlərindən biridir. Bu baxımdan, dəhlizin genişləndirilməsi və inkişafı həm daşımaların sürətinə, həm də iqtisadi səmərəliliyə təsir edəcək. Bu, yüklərin daşınması sürətini artıracaq və daha ucuz yükdaşınmanın həyata keçirmək üçün imkanlar yaradacaq. Belə əlverişli infrastrukturdan istifadə edib hansısa layihələr keçirmək həm bizə, həm də qonşu ölkələrə lazımdır”.
R.Quliyev onu da vurğuladı ki, nəqliyyat infrastrukturu ətrafında müəssisələrin yaradılması qeyri neft-qaz sektorunda istehsalın artımına gətirib çıxarır, yeni iş yerlərinin açılması imkanını yaradır, məşğulluğun genişlənməsinə, işsizliyin azalmasına, eləcə də ümumi daxili məhsulun həcminin artmasına, vergilər və gömrük rüsumları üzrə yığımlara müsbət təsir edir.
Bəsti Rəfizadə
