Çin ABŞ-nin yeni tariflərinə reaksiya verdi
Çin rəsmiləri ABŞ-nin yeni tarif qərarlarının ölkənin iqtisadi bərpa səylərini poza bilməyəcəyini açıqlayıblar.
Sfera.az “Reuters” nəşrinə istinadən xəbər verir ki, Çin Milli İnkişaf və İslahatlar Komissiyasının (NDRC) sədr müavini Zhao Chenxin Pekinin 2025-ci il üçün müəyyən etdiyi təxminən 5%-lik iqtisadi artım hədəfinə çatacağına “tam əmin” olduqlarını bildirib. Zhao yeni stimullaşdırıcı tədbirlər barədə təfərrüat verməsə də, ikinci rübdə iqtisadi artımı dəstəkləyəcək yeni siyasətlərin tətbiq olunacağını qeyd edib.
“Birinci rübün nəticələri ilin qalan hissəsi üçün möhkəm zəmin yaradıb,” – o vurğulayıb. Həmçinin, beynəlxalq vəziyyətdən asılı olmayaraq, inkişaf hədəflərinə sadiq qalacağını deyib.
ABŞ Prezidenti Donald Trampın təşəbbüsü ilə Çindən idxal olunan əksər məhsullara 145% tarif tətbiq edilməsi və Çinin ABŞ mallarına cavab olaraq 125% rüsum qoyması qlobal iqtisadiyyatda narahatlıq yaradıb. Beynəlxalq Valyuta Fondu (BVF), "Goldman Sachs" və "UBS" kimi qurumlar Çin üçün 2025–2026-cı illərə dair iqtisadi artım proqnozlarını aşağı salıblar və Pekinin rəsmi hədəflərinə çatmasını şübhə altına alıblar.
Artan ticarət müharibəsi zəif gəlir artımı və davam edən əmlak böhranı səbəbindən deflyasiya riski ilə üzləşən Çin iqtisadiyyatı üçün çətin dövrə təsadüf edir. Analitiklər Pekinin qarşıdakı aylarda əlavə monetar və fiskal stimullar tətbiq edəcəyini gözləyirlər. Çin Xalq Bankının (PBOC) sədr müavini Zou Lan bildirib ki, bank faiz dərəcələrində və kommersiya banklarının ehtiyat normalarında yeni endirimlər edə bilər və yuanın sabitliyini qorumağa davam edəcək.
Fidan Hacızadə
