Çin bəzi ABŞ məhsullarına gömrük rüsumunu ləğv edib – İddia

Çin hökumətinin ABŞ-dən idxal olunan bəzi yarımkeçiricilərə (çip) tətbiq etdiyi əlavə 125 faiz gömrük rüsumunu ləğv etdiyi iddia olunur.

Sfera.az "En Son Haber"ə istinadən xəbər verir ki, Çində fəaliyyət göstərən iqtisadiyyat və maliyyə xəbər xidməti "Caixi"nin sənaye mənbələrinə istinadla verdiyi məlumata görə, Pekin rəhbərliyi ən azı səkkiz növ inteqral sxemin gömrük rüsumundan azad ediləcəyini yerli şirkətlərə bildirib.

Xəbərdə qeyd olunub ki, Çin gömrük orqanları bu məhsulların idxalı üçün ödənilən rüsumların da şirkətlərə geri qaytarılacağını açıqlayıb.

Lakin məsələ ilə bağlı hələlik rəsmi açıqlama verilməyib və "Caixi"n sözügedən xəbəri sonradan internet saytından silib.

Digər tərəfdən, "Reuters" agentliyi adının açıqlanmasını istəməyən mənbəyə istinadən bildirib ki, Çin Ticarət Nazirliyi əlavə gömrük vergilərinin mənfi təsirini azaltmaq üçün yerli şirkətlərdən müəyyən məhsulların tariflərdən azad olunması ilə bağlı təkliflər istəyib.

Agentliyin məlumatına görə, Nazirlik bunun üçün xüsusi işçi qrupu yaradıb və gömrük güzəştləri tətbiq edilə biləcək məhsulların siyahısını hazırlayır.

Xatırladaq ki, ABŞ prezidenti Donald Tramp bir neçə gün əvvəl verdiyi açıqlamada Pekinlə tarif məsələləri üzrə danışıqlar apardıqlarını bildirmişdi. Lakin Çin hökuməti bu iddianı təkzib edərək, ABŞ ilə tariflərlə bağlı hər hansı bir görüşmə aparılmadığını bəyan edib.

Bəsti Rəfizadə