"Qlobal iqtisadiyyat kritik mərhələdədir" - Siluanov
“Qlobal iqtisadiyyat maliyyə sabitliyinə artan risklər və inflyasiya təzyiqləri fonunda kritik mərhələyə daxil olub”.
Sfera.az xarici KİV-ə istinadən xəbər verir ki, bu sözləri Rusiya Federasiyasının maliyyə naziri Anton Siluanov Beynəlxalq Valyuta və Maliyyə Komitəsinin (BVFK) 51-ci sessiyasında çıxışı zamanı bildirib.
O qeyd edib ki, qlobal iqtisadiyyat həssas bir mərhələdədir: “Artım proqnozları nəzərəçarpacaq dərəcədə aşağı salınıb. Maliyyə sabitliyinə təhdidlər, inflyasiya təzyiqləri və fiskal intizamın zəifləməsi kimi mənfi tendensiyalar müşahidə olunur”, – Siluanov vurğulayıb.
Nazirin sözlərinə görə, mövcud qeyri-müəyyənliklər fonunda vəziyyətin gələcək inkişafı beynəlxalq ictimaiyyətin əməkdaşlığı bərpa etmək, razılaşmalara nail olmaq və texnoloji innovasiyaları təşviq etmək bacarığından asılı olacaq. O əlavə edib ki, indiyə qədər əldə olunmuş nailiyyətlərin qorunması və xüsusilə məhsuldarlığın artırılması potensialına malik texnoloji sektorda yeni imkanlardan faydalanmaq vacibdir.
Digər tərəfdən, Rusiya baş nazirinin müavini Aleksey Overçuk Beynəlxalq Valyuta Fondu və Dünya Bankının İnkişaf Komitəsinin 111-ci iclasında çıxışı zamanı geoiqtisadi parçalanmanın davam etdiyini qeyd edib.
“Qlobal iqtisadiyyat hələ də COVID-19 pandemiyasının uzunmüddətli təsirlərini hiss edir. İnkişaf etmiş ölkələrdə sərtləşdirilən pul-kredit siyasəti və geoiqtisadi parçalanma inkişaf etməkdə olan bazarlar və iqtisadiyyatlar üçün ciddi gərginliklər yaradır. Qlobal ticarət artımı zəifləyib, tədarük zəncirlərinə məhdudiyyətlər qoyulub və proteksionist tədbirlər bu prosesi daha da mürəkkəbləşdirir”, – Overçuk deyib.
Fidan Hacızadə
