Bələdiyyələr vergi yığımlarını artırıblar - Gəlirlər rekord həddə çatıb

2024-cü ildə Azərbaycanda fəaliyyət göstərən 1606 bələdiyyənin ümumi gəliri 2023-cü illə müqayisədə 14,4 faiz artaraq 62,36 milyon manata çatıb. Bir il əvvəl bələdiyyələrin cəmi gəliri 54,5 milyon manat olmuşdu.

Sfera.az xəbər verir ki, ötən il bələdiyyələrin gəlirində rekord göstərici qeydə alınıb.

Əvvəlki illərin heç birində bələdiyyələr belə yüksək gəlirə sahib olmayıblar.  

Bələdiyyələrin gəlirinin böyük hissəsini vergi olmayan gəlirlər təşkil edib. Ötən il bələdiyyələr 35,1 milyon manat vergi olmayan gəlir əldə edib. Bu növ gəlirlərdə 10 faiz artım var. 

Vergi olmayan gəlirlərin 13,6 milyon manatı bələdiyyə əmlakının özgəninkiləşdirilməsindən, 9 milyon manatı bələdiyyə əmlakının icarəyə və istifadəyə verilməsindən, 7,7 milyon manatı Azərbaycan dövlət büdcəsindən verilən dotasiya və subvensiyalardan, 2,5 milyon manatı sanatoriya-kurort, mehmanxana və turizm xidmətlərinə görə ödənişlərdən ibarət olub. Vergi olmayan gəlirlərin 2,3 milyon manatı digər gəlirlərdən əldə edilib. 

Bələdiyyələr vergilərdən 27,2 milyon manat toplayıb və bu növ gəlirlərdə 20 faizdən çox artım baş verib. 

Ən çox vergi fiziki şəxslərdən toplanan əmlak vergisi (19,4 milyon manat) olub. Bu növ vergi üzrə daxilolmalarda 27 faizdən çox artım baş verib. 

Torpaq vergisi isə 7,8 milyon manat təşkil edib. 

Vasif