Bu ərazilərdə çalışanlar üçün ödənişlər dəyişdirilə bilər

"Azad torpaqlarda çalışanlar üçün ödənişlərə dair meyarlar və standartların dəyişdirilməsi zəruridir”.

Sfera.az xəbər verir ki, bunu Milli Məclisin bu gün keçirilən iclasında deputat Zahid Oruc deyib.

Millət vəkili qeyd edib ki, azad olunan torpaqlarda yeni Vətən quruculuğunda işləyən fəhlənin, iş icraçısının və şirkətlərin hər biri qəhrəmandır. Müqəddəs əməyi təmsil edirlər və digər ərazilərdə çalışanlardan fərqləndirilməldirlər. Deputat bu səbəblə Qarabağda çalışanların fəaliyyətinə daha həssas yanaşmanın labüdlüyünü bildirib:

"Söhbət qurulu şəraitdə və hazır infrastrukturu olan yerlərdə çalışmaqdan getmir. Ona görə də azad torpaqlarda çalışan hər bir insan üçün ödənişlərə dair meyarlar və standartların dəyişdirilməsi zəruridir. Biz sovet illərində böyük yazıçılarımızın Mil-Muğan çöllərində gedən quruculuq işlərini necə tərənnüm etdiyini yaxşı xatırlayırıq. İndi isə inşaat meydanlarına həqiqətən xüsusi təyinatlı bir ordu-silahsız tikinti briqadaları millətimizin gələcəyi üçün fədakar əməyini görürük. 

İnanırıq ki, müxtətif dövlət təltifləri də Yeni Vətən quruculuğunda çalışan insanlarımıza veriləcəkdir. Çünki onlar 44 günlük müharibədə qəhrəmanlıq göstərən oğullarımızın müqəddəs işlərini davam etdirirlər".

Firuzə Əliyeva