Azərbaycan ilə Çin arasında iqtisadi münasibətlər inkişaf edir. Son illərdə bu əlaqələrin strateji tərəfdaşlıq səviyyəsinə yüksəldiyi müşahidə olunur. Tərəflər arasında ticarət dövriyyəsinin artması, qarşılıqlı sərmayələrin genişlənməsi və “Orta Dəhliz” üzrə əməkdaşlıq bu istiqamətdə mühüm göstəricilər sırasındadır. Bu münasibətlərin davamı kimi Azərbaycanda Çin şirkətlərinə aid olan müəssisələrin sayı da artmaqdadır.

Sfera.az-a açıqlama verən iqtisadçı-ekspert Eyyub Kərimli bildirib ki, Çin ilə Azərbaycan arasında ciddi iqtisadi əlaqələr mövcuddur və bu münasibətlərdə inkişaf müşahidə olunur.

E.Kərimli qeyd edib ki, iki ölkə arasındakı ticarət dövriyyəsi 3,7 milyard dollara yüksəlib və bu, əvvəlki illərlə müqayisədə 20,7% artım deməkdir:

"Hazırda Azərbaycanın ən çox mal idxal etdiyi ölkələrdən bri də Çindir. 2024-cü ildə ən çox mal Çindən alınıb. Ölkəmizə idxal olunan malların 17,8%-i Çinin payına düşüb”.

Ekspert bildirib ki, Çinin Azərbaycana birbaşa investisiyalarının həcmi 1 milyard dollara yaxınlaşır:

"Çin şirkətlərinin ölkəmizə yatırdığı investisiyalarda 85-86%-lik artım qeydə alınıb. Bu, Çinin Azərbaycan iqtisadiyyatına artan marağının göstəricisidir. Azərbaycan da Çinə 14 milyon dollarlıq məhsul ixrac edir və bu rəqəmlərin gələcəkdə artacağı gözlənilir".

O vurğulayıb ki, Çin Azərbaycanın “Orta Dəhliz” layihəsindəki roluna xüsusi önəm verir.

“Gələcəkdə Azərbaycan bu layihə çərçivəsində əsas logistik mərkəzlərdən birinə çevrilə bilər. Bu isə həm yükdaşımaların həcminə, həm də ölkəmizin iqtisadi mənfəətinə ciddi təsir göstərəcək”, – deyə ekspert bildirib.

Ekspert ABŞ-nin Çinlə ticarət müharibəsi fonunda Azərbaycanın Çin üçün əhəmiyyətinin bir qədər də artdığını söylədi:

“Mövcud geosiyasi şəraitdə Çinin Azərbaycana marağının daha da artacağı gözlənilir. "Orta Dəhliz" və "Çin–Avropa" marşrutu üzrə həyata keçirilən 600 milyon dollara yaxın layihələr qarşılıqlı əməkdaşlıq üçün ciddi potensial yaradır”.

E.Kərimli gələcəkdə Azərbaycanda Çin mallarının yerli istehsalının təşkilinin mümkün olduğunu da vurğuladı:

“Birgə istehsal müəssisələrinin yaradılması imkanları da var. Azərbaycanın coğrafi mövqeyi və nəqliyyat-logistika imkanları Çin üçün olduqca cəlbedicidir. Bu, Çin tərəfinin ölkəmizə daha çox sərmayə yatırmasında marağını artırır".

Bəsti Rəfizadə

Azərbaycanda Çin malları artır: "Gələcəkdə birgə müəssisələr də yaradıla bilər"