Bank Respublikaya inam zəifləyib? - Müştərilər 136 milyon manatı çıxarıb
Azərbaycanın tanınmış banklarından olan "Bank Respublika" ASC-yə müştərilərin etimadı azalıb.
Sfera.az bankın açıqladığı rüblük məlumata istinadən xəbər verir ki, 2025-ci ilin yanvar-mart aylarını əhatə edən 3 ay ərzində bankda olan depozitlərin məbləği 136 milyon manata yaxın azalıb.
2024-cü ilin sonunda bankda 1,348 milyard manat depozit olduğu halda 2025-ci ilin aprelin 1-də depozitlərin məbləği 1,212 milyard manata düşüb.
Depozitlərdə ən çox azalma hüquqi şəxslərin vəsaitlərində müşahidə edilib. Hüquqi şəxslər bankda olan 712 milyon manat məbləğindəki depozitlərinin 116 milyon manatını götürüb. Nəticədə bankda hüquqi şəxslərə aid olan depozitlərin məbləği 596 milyon manata düşüb.
Fiziki şəxslərin də əmanətlərində azlama qeydə alınıb. Fiziki şəxslərin əmanətlərinin məbləği 3 ay ərzində 20 milyon manat azalaraq 616 milyon manat olub.
“Bank Respublika” depozitlərdə 135 milyon manatlıq azalmanı kompensasiya etmək üçün digər mənbələrdən böyük məbləğdə borc cəlb edib.
Belə ki, 3 ay ərzində bank kredit təşkilatları və digər maliyyə institutları qarşısında borcunu 534,5 milyon manatdan 715 milyon manata çatdırıb. Yəni, bank bu istiqamət üzrə borcunu 180,5 milyon manat artırıb.
Məhz bu artım hesabına bankın ümumi öhdəlikləri də artaraq 2 milyard manatı keçib.
Vasif
