Çin iqtisadiyyatında artım qeydə alındı
Çin iqtisadiyyatı 2025-ci ilin ilk rübündə gözləntiləri aşaraq illik əsasda 5,4 faiz artıb.
Sfera.az xarici mediaya istinadən xəbər verir ki, bu barədə ölkənin Milli Statistika Bürosu (NBS) məlumat yayıb. Yanvar-mart aylarını əhatə edən dövrdə Ümumi Daxili Məhsul (ÜDM) ötən ilin eyni dövrü ilə müqayisədə nəzərəçarpacaq dərəcədə yüksəlib.
Rəqəmlər göstərir ki, artım tempi Çin hökumətinin 2025-ci il üçün müəyyən etdiyi “təxminən 5 faiz” hədəfini üstələyib. ÜDM, həmçinin, 2024-cü ilin son rübü ilə müqayisədə 1,2 faiz artım göstərib.
Xatırladaq ki, Çin iqtisadiyyatı 2024-cü ili də 5 faiz artımla tamamlamış və hökumətin illik artım hədəfinə çatmışdı. Bu il üçün də eyni tempdə inkişaf planlaşdırılıb.
Bununla belə, ABŞ-lə ticarət gərginliyi, qarşılıqlı tarif artımları və qlobal iqtisadi tənəzzül ehtimalları ilin qalan dövründə Çin iqtisadiyyatının artım tempinə mənfi təsir göstərə bilər. Ekspertlər bu amillərin iqtisadi qeyri-müəyyənlik yaratdığını bildirirlər.
Fidan Hacızadə
