Güzəştli mənzilləri daha çox hərbçilər, müəllimlər və polislər alır
Bu günə qədər Mənzil İnşaatı Dövlət Agentliyinin (MİDA) “Güzəştli mənzil” sistemi vasitəsilə mənzil əldə edən vətəndaşlar arasında çoxluğu hərbçilər, müəllimlər və polislər təşkil edib.
Sfera.az xəbər verir ki, bunu “Report”a müsahibəsində MİDA-nın İdarə Heyəti sədrinin müavini Elşad Məmmədov deyib.
Qaydalara əsasən, an azı 3 il hərbi xidmətdə olan, ehtiyata və istefaya buraxılmış hərbi qulluqçular, ən azı 15 il dövlət ümumi təhsil müəssisəsində müəllim kimi çalışanlar, eləcə də daxili işlər orqanlarında ən azı 3 il xidmət keçmiş xüsusi rütbəli şəxslər “Güzəştli mənzil” sistemi vasitəsilə mənzil əldə edə bilər.
E.Məmmədovun sözlərinə görə, güzəştli mənzillərin əldə olunması yalnız “Elektron hökumət” portalı üzərindən “Güzəştli mənzil” sistemi vasitəsilə, gücləndirilmiş elektron imza ilə və real vaxt rejimində həyata keçirilir.
“Bu günə olan məlumata əsasən, sistemdə elektron kabinetə sahib olan şəxslərin sayı 39 748 nəfərdir. Mənzillərin əldə edilməsində əsas ödəniş üsulu kimi güzəştli ipoteka krediti mexanizmindən istifadə olunub”, - deyə sədr müavini qeyd edib.
