ABŞ Prezidenti Donald Trampın vəzifəsinin icrasına başlamasından sonra qlobal bazarlarda müşahidə olunan dalğalanmalar və iqtisadi qeyri-müəyyənliklər, milyarder İlon Maskın sahibi olduğu "Tesla" şirkətinə də ciddi təsir edib. Şirkətin səhmləri 2025-ci ilin ilk rübündə 50 faizdən çox dəyər itirib.

Sfera.az xəbər verir ki, Trampın siyasətləri və açıqlamaları, xüsusilə texnologiya və avtomobil sektorlarında fəaliyyət göstərən şirkətlərə mənfi təsir göstərməkdədir.

Bu durum, adıçəkilən sahələrdəki iri şirkətlərin bazar dəyərində ciddi enişlərə səbəb olub.

2024-cü ilin dekabrında "Tesla" səhmləri rekord səviyyəyə – 480 dollara yüksəlsə də, 2025-ci ilin ilk aylarında bu göstərici 222 dollara qədər geriləyib. Bu, "Tesla"nın bazar dəyərinin 1,5 trilyon dollardan 850 milyard dollara enməsi ilə nəticələnib.

Səhmlərdəki bu eniş şirkətin prezidenti İlon Maskın şəxsi sərvətinə də zərbə vurub. 2024-cü ilin sonunda 486 milyard dollar olan Maskın sərvəti, 2025-ci ilin aprelində 300 milyard dolların altına düşüb. Bu isə təxminən 38 faizlik azalma deməkdir.

İlon Mask hazırda Tramp administrasiyası tərəfindən yaradılan Hökumət Səmərəliliyi Departamentində (DOGE) məsləhətçi kimi fəaliyyət göstərir.

Sərvət itkisi ilə üzləşən tək şəxs İlon Mask deyil. Trampı açıq şəkildə dəstəkləyən digər milyarderlərin də sərvətində azalma müşahidə olunur. "Amazon"un qurucusu Cef Bezosun sərvəti 260 milyard dollardan 220 milyard dollara, "Meta"nın rəhbəri Mark Zuckerbergin sərvəti isə 259 milyard dollardan 221 milyard dollara enib. "Oracle" şirkətinin qurucusu Larry Ellisonun sərvəti də 211 milyard dollardan 169 milyard dollara düşüb.

Mütəxəssislər bu tendensiyanın davam edə biləcəyini və ABŞ-nin yeni administrasiyasının siyasətinin bazarlara təsirinin gələcək aylarda daha da aydınlaşacağını bildirirlər.

Bəsti Rəfizadə

"Tesla"nın dəyəri düşdü - Maskın sərvəti əriyir