Süni intellekt enerji böhranına səbəb olacaq – Hesabat

Beynəlxalq Enerji Agentliyinin (IEA) yeni hesabatına görə, süni intellekt texnologiyalarına olan qlobal marağın sürətlə artması nəticəsində məlumat mərkəzlərinin enerji istehlakı 2030-cu ilə qədər dörd dəfə arta bilər. Mütəxəssislər xəbərdarlıq edir ki, bu artım dünya üzrə enerji sistemləri və ətraf mühit üçün ciddi təhdid yaradacaq.

Sfera.az hesabata istinadən xəbər verir ki, yalnız ABŞ-də məlumat emalı və süni intellekt fəaliyyətləri 2030-cu ildə polad, sement və kimya sənayesi kimi enerji tutumlu sahələrin ümumi istehlakından daha çox elektrik enerjisi istifadə edəcək.

IEA-nın sənədində bildirilib ki, bu texnologiyalar enerji istehlakını artırsa da, süni intellektin enerji səmərəliliyinin yüksəldilməsi, ictimai xidmətlərin optimallaşdırılması və bərpa olunan enerji mənbələrinin inteqrasiyası kimi sahələrdə müsbət təsir potensialı da mövcuddur. Bu baxımdan, süni intellektə əsaslanan sistemlər uzun müddətli dövrdə istixana qazı emissiyalarının azaldılmasına töhfə verə bilər.

Bununla belə, hesabatda vurğulanır ki, süni intellektin tənzimlənməyən və sürətli inkişafı halında bu texnologiya mövcud enerji səmərəliliyi nailiyyətlərini aradan qaldıra bilər. Xüsusilə ABŞ-də bağlanmış kömür elektrik stansiyalarının yenidən işə salınması ehtimalı və məlumat mərkəzlərinin soyutma suyu tələbatı quraq bölgələrdə su ehtiyatlarına əlavə təzyiq yarada bilər.

IEA mütəxəssisləri dövlətləri bu sahədə vaxtında addımlar atmağa və süni intellektin enerji sistemlərinə təsirini düzgün şəkildə yönləndirməyə çağırır.

Bəsti Rəfizadə