Neftin ucuzlaşması Azərbaycan üçün arzuedilən deyil - Azad Məmmədov

ABŞ-də Donald Trampın hakimiyyətə gəlməsindən sonra neft qiymətlərində enmələr müşahidə edilir. Tramp hakimiyyətinin ilk vaxtlarında neftin ucuzlaşması siyasi bəyanatlarla bağlı idisə, son günlərdəki ciddi ucuzlaşma iqtisadi qərarlarla əlaqəlidir.  ABŞ-nin idxal əməliyyatları ilə bağlı yeni tarifləri elan etməsindən sonra qlobal iqtisadiyyatda narahatçılıq yüksək səviyyəyə çatıb. Ən çox narahatçılıq yaradan ehtimal isə qlobal səviyyədə ticarət müharibələrinin baş verməsi və nəticədə qlobal tələbin zəifləməsidir. Qlobal tələb zəifləyərsə dünya iqtisadiyyatı yenidən böhrana girəcək və əsas əmtəələr ucuzlaşacaq. 
 

Azərbaycan üçün əsas narahatçılıq yaradan məsələ neftin qiyməti ilə bağlıdır. 

Sfera.az-a açıqlama verən iqtisadçı-ekspert Azad Məmmədov neftin ucuzlaşmasının Azərbaycanın dövlət büdcəsinə və əsaslı xərclərə ciddi təsir göstərə biləcəyini vurğulayıb. 

“Neft qiymətlərinin enməsi dövlət büdcəsinin gəlirlərini azalda və büdcə kəsirini artıra bilər. Büdcə gəlirləri azalanda dövlət məcbur olub daha çox əsaslı xərcləri, eləcə də cari xərclərin bir hissəsinin maliyyələşdirilməsini dayandıracaq”, – deyə ekspert bildirib.

İqtisadçı neft qiymətlərinin aşağı səviyyədə uzun müddət qalması ehtimalını da nəzərdən keçirib: "Neftin qiyməti aşağı düşdükdən sonra həmin səviyyədə sabitlənəcəyi təqdirdə Azərbaycanın iqtisadiyyatına ciddi təsirlər yaranacaq. Bu vəziyyətdə ümumi iqtisadi artım sürəti zəifləyəcək, hətta iqtisadi geriləmənin baş verməsi riski yaranacaq".

A.Məmmədov bu kimi hallarda neqativ təsirləri minimuma endirmək üçün iqtisadiyyatın şaxələndirilməsinin vacib olduğunu da qeyd etdi. 

Bəsti Rəfizadə