Çin rəhbərliyi ABŞ-nin gömrük rüsumlarını artırmasına sərt reaksiya verib. Pekin öz iqtisadi maraqlarını qorumaq üçün qətiyyətli cavab tədbirləri görəcəyini açıqlayıb.

Sfera.az xəbər verir ki, Çin Ticarət Nazirliyi ABŞ-nin bütün ticarət tərəfdaşlarına qarşı tətbiq etdiyi yeni gömrük tariflərini tənqid edərək, bu qərarın birtərəfli və beynəlxalq ticarət qaydalarına uyğun olmadığını bildirib.

Nazirliyin açıqlamasında qeyd edilib:

“Bu, klassik birtərəfli zorakılıq siyasətidir. ABŞ-nin bu addımı yalnız öz iqtisadi maraqlarına ziyan vurmaqla qalmayacaq, həm də qlobal iqtisadiyyata və tədarük zəncirinin sabitliyinə ciddi təsir edəcək”.

Pekin bildirib ki, ABŞ-nin tətbiq etdiyi yeni tariflər illərlə aparılan çoxtərəfli ticarət danışıqları nəticəsində əldə edilmiş iqtisadi balansı pozur və Vaşinqtonun beynəlxalq ticarətdən əldə etdiyi böyük faydanı nəzərə almır.

Bununla yanaşı, ABŞ-nin bir çox ticarət tərəfdaşı yeni tariflərə açıq şəkildə narazılıq bildiriblər.

“Tarif artımları ABŞ-nin iqtisadi problemlərini həll etməyəcək. Ticarət müharibəsində qalib olmur, proteksionizm isə çıxış yolu deyil”, - deyə Çin Ticarət Nazirliyi xəbərdarlıq edib.

Açıqlamada ABŞ-yə tarif qərarlarını ləğv etməsi və ticarət tərəfdaşları ilə bərabərhüquqlu dialoq yolu ilə problemləri həll etməsi çağırış edilib.

ABŞ Prezidenti Donald Tramp, ölkəsinin sabahdan etibarən bütün ticarət tərəfdaşlarına “qarşılıqlı tariflər” tətbiq edəcəyini bəyan edib. Bu çərçivədə Çin üçün əsas tarif dərəcəsinə əlavə olaraq 24% əlavə gömrük vergisi tətbiq olunacaq. Çindən ABŞ-yə ixrac həyata keçirən şirkətlər ümumilikdə 34% rüsum və vergi ödəməli olacaqlar.

Yeni tariflərdən 10%-lik əsas tarif 5 aprel tarixindən, əlavə 24%-lik tarif isə 9 aprel tarixindən etibarən tətbiq ediləcək.
Xatırladaq ki, Tramp fevral ayında imzaladığı fərmanla Çindən idxal olunan məhsullara 10% gömrük vergisi tətbiq etmiş, mart ayında isə bu tarifi 20%-ə yüksəltmişdi.

Bəsti Rəfizadə

Çin ABŞ-nin gömrük siyasətindən narazıdır: "Bu, klassik zorakılıqdır"