“Ölkəmizin müxtəlif yerlərində iqtisadi fəallığın kəskin azalması müşahidə olunur və xarici sərmayələrin də cəlb olunmasında ciddi problemlər yaşayırıq”.

Sfera.az xəbər verir ki, bunu Milli Məclisin bu gün keçirilən plenar iclasında deputat Razi Nurullayev deyib.

Millət vəkilinin sözlərinə görə, bir çox iş adamı rayon və şəhərlərdə zavod və fabriklərini bağlayaraq Qarabağ zonasına yatırım ediblər:

"“Lisenziyalar və icazələr haqqında” qanuna edilən bu dəyişikliyə görə, işğaldan azad edilmiş ərazilər üzrə iqtisadi fəaliyyət sahələri və mal nomenklaturası üzrə hüquqi şəxslər və sahibkarlıq edən fiziki şəxslər idxal zamanı əlavə dəyər vergisindən və gömrük rüsumundan azad edilməsi çox mütərəqqidir və dəstəkləyirəm. Məhz, bu cür müsbət dəyişikliklər Qarabağ zonasında iqtisadi aktivliyin artmasına səbəb olub. Azərbaycanın müxtəlif şəhər və rayonlarında iqtisadi fəallıq xeyli azalmış, bəzi iş yerləri bağlanmışdır. Prinsipcə, bu yaxşıdır, həm də narahatedici. Azərbaycanın bir nöqtəsində iş yerlərinin bağlanması və əvəzində digər nöqtəsində açılması nə dövlətin, nə də hökumətin marağında ola bilər”.

R.Nurullayev təklif edib ki, müxtəlif iqtisadi fəaliyyət sahələri üzrə ciddi vergi güzəştləri tətbiq edilsin:

“Biz elə etməliyik ki, yerli və xarici sərmayədar pulunu və biznesini Azərbaycana köçürmək istəsin. Bunun üçün ikinci addım olaraq iqtisadi fəaliyyət sahəsində məhkəmə sisteminin yüz faiz şəffaflığına nail olmalı və onlara inamı artırmalıyıq. Həmçinin, Vergi Məcəlləsini bütövlükdə yenidən yazmalı və ən azı, 60-70 faiz sadələşdirməliyik ki, onu oxuyan iş adamı çətin alqoritmik hesablamalar içində başını itirməsin, sadə dildə onu anlamağı bacarsın. Vahid və sadə bir məcəllə olsun. Bundan başqa, əmlak toxunulmazlığı faktiki və konkret olaraq toxunulmaz olmalı və bu sahədə zərrə qədər də şübhəyə nə yerli, nə də xarici sərməyadarda şübhə olmalıdır”.

Deputat iş yeri yaradacaq bizneslərin qurulması zamanı infrastruktur xərcləri, yəni qaz, işıq, su, kanalizasiya, torpaq sənədləşməsi, icazələrin alınmasının böyük xərc apardığını vurğulayıb:

“Deyək ki, bir nəfərin 5 milyon manatı var və yatırım etmək istəyir. Əgər, güzəştli sənaye parklarına yatırım edərsə, o zaman yəqin ki, xərclər az olacaq və ona sərf edər. Amma hər kəs də sənaye ilə məşğul olmaq istəmir və yaxud digər şəhər və rayonlarda biznes qurmaq istəyir. Bu zaman onun 5 milyonunun demək olar ki, hamısı alqı-satqıya, ödənişlərə və icazələrə gedir. Adamın iş görmək həvəsi elə rüşeymində ölür. Onun üçün də təklif edirəm ki, infrastruktur layihələri dövlət tərəfindən həyata keçirilsin, konkret biznes layihələrini hazır paket şəklində simvolik qiymətə sərmayəçilərə satsınlar. Onların üzərinə isə konkret sərmayə və konkret sayda iş yeri yaratmaq öhdəliyi qoyulsun”.

Firuzə Əliyeva

"Dövlət biznes layihələrini hazır paket şəklində satmalıdır" - Razi Nurullayev