Manatın məzənnəsi ilə bağlı MÜHÜM AÇIQLAMA

Mərkəzi Bank xəbər verir ki, 28.02.2025-ci il tarixində pul bazası 19 milyard 842 milyon manat təşkil edib. Bu da o deməkdir ki, 2025-ci ilin fevral ayında Azərbaycanda pul bazası 282,1 milyon manat və ya 1,4% azalıb.
 

Nəzərə alaq ki, 2025-ci ilin yanvar ayında pul bazası 792,4 milyon manat və ya 3,8% azalmışdı.
 

Pul bazası 29.12.2024-cü il tarixində 20 milyard 916.5 milyon manat, 31.01.2025-ci il tarixində isə 20 milyard 124.1 milyon manat təşkil etmişdi. 

Məlumat üçün bildirək ki, pul bazası dedikdə Pul kütləsinin Mərkəzi Bank tərəfindən qısa müddət ərzində dəyişdirilə bilən hissəsi nəzərdə tutulur. Pul bazasının tərkibinə dövriyyədə olan nağd pul və bank ehtiyatları (kommersiya banklarının Mərkəzi Bankdakı müxbir hesablarının qalıqları) daxildir.

Qeyd edək ki, pul kütləsi dövriyyədə olan nağd və qeyri-nağd ödəniş vasitələrinin məcmusudur.
 

Bəs, pul bazasının kiçilməsinin hansı fəsadları ola bilər?
 

Sfera.az xəbər verir ki, mövzu ilə bağlı Bizim.Media-ya danışan iqtisadçı ekspert Fuad İbrahimov deyib ki, pul bazasında azalma var, amma bu ciddi rəqəm deyil:

“Bu amildən müsbət mənada yararlanmaq olar. Belə bir fikir var ki, dövriyyədəki pul kütləsi azalanda iqtisadiyyat kiçilir. Çünki kapital azaldıqca iqtisadiyyat sıxılır. Nəzərə alaq ki, pul bazasının azalması həm də bir alətdir. Bu alətdən istifadə edib infilyasiyanın qarşısını alırlar.

Həmçinin valyutanın məzənnəsinə təsir edən alət kimi də pul kütləsinin azalmasından istifadə edilir. Amma real vəziyyətə dediyimiz amillərin heç bir aidiyyatı yoxdur. Pul kütləsinin azalmasının səbəbi odur ki, il yeni başlayıb. Büdcə xərclərinin hərəkətə gəlməsində müəyyən yubanmalar olub. Bu da pul dövriyyəsinin azalmasına şərait yaradıb.

Maaş, pensiya və digər müavinətlər verilsə də, bəzi sahələrə, məsələn əsaslı kapital qoyuluşuna vəsaitin xərclənməsində ləngimələr var. Bu da hər ilin başlanğıcında təsadüf etdiyimiz reallıqdır. Əgər pul dövriyyəsinin kiçilməsi 4-5 ay davam edərsə, yalnız o zaman narahat olmağa dəyər. Hələlik, belə bir ehtimal yoxdur”.