AK-nın ABŞ cavabı Azərbaycana nə gətirəcək? - AÇIQLAMA
Avropa Komissiyası (AK) ABŞ-nin ixracına qarşı yeni əks-tədbirlər paketi irəli sürəcək. Cavab tədbirləri 18 milyard avro məbləğində mallara təsir edəcək.
Qeyd edək ki, Aİ Azərbaycanın əsas ticarət tərəfdaşlarından biridir. Bu mənada yeni əks-tədbirlər fonunda Aİ ilə Azərbaycan arasında ticarət dövriyyəsi necə dəyişə bilər?
Bununla bağlı Sfera.az- a açıqlama verən politoloq Əlimusa İbrahimov Avropa Komissiyasının Amerika Birləşmiş Ştatlarının yeni tarif siyasətinə qarşı tədbirlər görmək məcburiyyətində olduğunu bildirib.
Politoloqun sözlərinə görə, əgər Avropadan ixrac olunan mallara Vaşinqton tərəfindən əlavə vergilər qoyulursa, AK da öz növbəsində Amerikadan ixrac etdiyi malların tariflərini artıracaq.
"Bu ixrac-idxal mallarının iki ölkədə kəskin şəkildə artması ilə müşahidə olunacaq. Əziyyət çəkən isə Avropa və ABŞ-də yaşayan xalqlar olacaq. Amma ABŞ-Avropa arasında ticarət müharibəsindən digər ölkələrin ziyan çəkəcəyi ciddi müşahidə olunmaya bilər. Çünki digər ölkələr vergi tariflərinin artırılması prosesində iştirak etməkdə maraqlı deyillər. Əksinə ABŞ-dən ixrac olunan malların alternativi digər ölkələrdə varsa, Avropa ölkələri daha ucuz malları almaqda maraqlı ola bilər. Beləliklə ABŞ ilə Avropa arasında baş verən ticarət münaqişəsi digər ölkələrdən, o cümlədən Azərbaycandan ixracın artmasına şərait yaradacaq”.
Fidan Hacızadə
