Novruz bayramı ilə əlaqədar Kənd Təsərrüfatı Nazirliyinin tabeliyindəki “Aqrar Tədarük və Təchizat” ASC tərəfindən növbəti “Kənddən şəhərə” Novruz yarmarkası təşkil olunub.

Nərimanov rayonu, Fətəli xan Xoyski küçəsi, 5 (“Gənclik” metro stansiyasının çıxışı) ünvanında keçirilən yarmarkanın təşkilində əsas məqsəd bayram günlərində insanların kənd məhsullarına artan tələbatlarını yerli və sağlam məhsullarla təmin etmək, fermer təsərrüfatları üçün alternativ satış kanalı yaratmaqdır.
Yarmarkanın əsas üstünlüklərindən biri məhsulların istehsalçıların özləri tərəfindən birbaşa satışa çıxarılmasıdır.

Sfera-az-ın əməkdaşları Nərimanov rayonunda təşkil olunan yarmarkada iştirak edərək, satıcı və alıcıların fikirlərini soruşub, daha çox hansı məhsulların satıldığını, alıcıların hansı məhsullara üstünlük verdiyini öyrəniblər.

Ordubad rayonundan gələn satıcı Şahin Əsgərov satışlardan razı olduğunu bildirib. O keçən ilə nisbətən bu il satışların daha yaxşı olduğunu deyib:

“Alıcılar əsasən qoz, fındıq, aş üçün istifadə olunan şabalıd, kişmiş və digər məhsullara üstünlük verirlər”.

İsmayıllı rayonundan gələn fermer Aqil Nəzərov məhsulların böyük hissəsinin öz təsərrüfatlarında istehsal etdiklərini qeyd edib. Onun sözlərinə görə, yarmarkadakı qiymətlər bazar və supermarketlərlə müqayisədə 50 faizədək aşağıdır:

“Bunun əsas səbəbi yarmarkanın dövlət dəstəyi ilə təşkil olunmasıdır. Bizim üçün bütün xərclər qarşılandığı üçün qiymətləri əlçatan saxlaya bilirik”.

İsmayıllıdan gələn digər fermer Rövşən Novruzov isə alıcıların sirkə və üzüm yarpağına xüsusi maraq göstərdiyini bildirdi. O yarmarkaya gətirdikləri sirkəni şəxsi təsərrüfatlarında istehsal etdiklərini və tam təbi olduğunu vurğuladı:

“Pip yarpağı ən keyfiyyətli dolma üçün alınır. Bundan əlavə, bura gələnlər mürəbbə və turşulara da böyük maraq göstərir. Keçən ilə nisbətən bu il satışlar daha yaxşıdır”.

Yarmarkada satılan məhsullar arasında müxtəlif növ ballar da var. Gəncədən gələn Zenfira İmanova da bal satır. Zenfira xanım balı Tərtər rayonunun Suqovuşan kəndindən və Daşkəsən rayonundan gətirdiyini söylədi:

“Bu il qiymətlər keçən ilə nisbətən qalxıb, amma alıcılar narazılıq etmir. Yarmarka bizim üçün məhsullarımızı satmağa çox yaxşı imkan yaradır”.

Ət məhsulları satan sabirabadlı Qurbanov Etiqad da qiymətlərin münasib olduğunu dedi:

“Dana ətini 14 manata, qoyun ətini isə 16 manata satırıq. Alıcılar qiymətdən şikayət etmirlər. Heyvanlarımızı rahat satmaq üçün yarmarka çox əlverişlidir”.

Yarmarkada çoxlu sayda alıcıya da rast gəlmək olurdu. Alıcılardan Sevinc Məmmədova bizimlə söhbətində yarmarkanın təbii və keyfiyyətli məhsullar almaq üçün əla fürsət yaratdığını dedi. “Burada hər şey təbii və dadlıdır”, - deyən Sevinc xanım söylədi ki, supermarketlərdə yarmarkalardakı kimi aşağı qiymətlərə məhsul tapmaq çətindir:

“Xüsusilə pendir, qaymaq və bal alıram. Hər il bu yarmarkanı səbirsizliklə gözləyirəm, çünki kənd təsərrüfatı məhsullarının birbaşa fermerlərdən alınması həm keyfiyyət baxımından, həm də qiymət baxımından çox sərfəlidir”.

Digər bir alıcı Ramiz Abbasov yarmarkanın sərfəli olduğunu vurğuladı: “İlin bu vaxtı belə keyfiyyətli kənd məhsullarını şəhərdə tapmaq çətindir. Üstəlik, qiymətlər də münasibdir. Təşkilatçılara təşəkkür edirik”.

Başqa bir alıcı Elçin Vəliyev də yarmarkadan məmnun qaldığını bildirib. Burada həm qiymətlərin münasib olduğunu, həm də məhsulların təbii olduğunu söyləyən E.Vəliyev ən çox ət və süd məhsulları aldığını bildirdi:

“Xüsusilə kənd pendiri və qaymağını çox sevirik. Üstəlik, satıcılar da məhsulları haqqında ətraflı məlumat verirlər, bu da alıcı üçün böyük üstünlükdür. Belə yarmarkaların daha tez-tez keçirilməsini istərdim”.

Qeyd edək ki, “Kənddən Şəhərə” yarmarkası 8-19 mart 2025-ci il tarixlərində fəaliyyət göstərəcək.

Bəsti Rəfizadə

Fotolar: Anar Bayramlı

“Qiymətlər marketlərdən 50 faiz aşağıdır” - "Kənddən Şəhərə” yarmarkasından REPORTAJ