Son bir neçə gündə beynəlxalq birjalarda səhmlərin və digər maliyyə aktivlərinin dəyər itirməsi müşahidə edilir.

Sfera.az xəbər verir ki, bu dəyişiklik neft qiymətlərinin də aşağı düşməsinə səbəb olur.

Xarici analitiklərin fikrincə, birjalarda baş verən geriləmənin əsas səbəbi ABŞ-də Donald Tramp administrasiyasının yürütdüyü iqtisadi siyasətlə bağlıdır. Tramp ABŞ-də istehsalı artırmaq üçün bəzi ölkələrdən idxal edilən mallara qarşı rüsumları artırıb. Buna cavab olaraq həmin ölkələr də oxşar addımlar atırlar.
İnvestorlar bu şərtlər daxilində ABŞ-də və Avropada iqtisadi artımın zəifləyəcəyini proqnozlaşdırırlar.

Artıq bu narahatçılığı ABŞ-nin iri investisiya bankı olan “Goldman Sachs” də dilə gətirib. Bankın proqnozuna görə, 2025-ci ildə ABŞ iqtisadiyyatı 2,4 faiz yox, 1,7 faiz böyüyəcək.

Bu cür bədbin proqnozlar və birjalarda baş verən ucuzlaşmalar neftin dəyərinə mənfi təsir göstərib. Son məlumatlara əsasən, ABŞ-yə aid olan şirkətlərin bazar dəyəri təxminən 6 trilyon dollar ucuzlaşıb. Bu ciddi bir azalmadır.

Birjalarda baş verən mənfi proseslər dolların məzənnə dəyərinə və neftin qiymətinə də ciddi təsir edir. Avronun son bir həftədə nəzərəçarpacaq dərəcə bahalaşması bunun əlamətidir. Bu ilin martın 3-də bir avro 1,04 dollar olduğu halda artıq məzənnə 1,09 həddinə çatıb.

Neft də ucuzlaşır. Düzdür, neftin qiymətində eniş artıq iki aydır ki, davam edir. Amma qiymətlərin 70 dollardan aşağı düşdükdən sonra bu səviyyədə qalması məhz iqtisadi proseslərlə bağlıdır. Son 2 ayda “Brent” neftinin qiyməti 82 dollardan 69,5 dollara qədər enib.

Mövcud vəziyyət investorları qorxudur və yəqin ki, Tramp ticarət müharibəsini davam etdirərsə bu, ABŞ iqtisadiyyatında və sonradan dünya iqtisadiyyatında böhran əlamətlərini yarada bilər.

Vasif

Dollar və neft ucuzlaşır - ABŞ iqtisadiyyatı böhrana girə bilər