Yüksək texnologiyaları xaricdən alırıq - "Bu sahədə mütəxəsis çatışmazlığı var"

2024-cü ildə Azərbaycanın yüksək texnologiyalar məhsullarının ticarətində ciddi kəsir yaranıb. Dövlət Gömrük Komitəsinin məlumatına əsasən, 2024-cü ildə ölkəyə 1,7 milyard dollar dəyərində yüksək texnologiyalar məhsulları idxal edilib. Eyni dövr ərzində Azərbaycanın yüksək texnologiyalar məhsullarının ixracı isə yalnız 183,8 milyon dollar təşkil edib. Nəticədə, yüksək texnologiyalar məhsulları ticarətində 1,53 milyard dollar kəsir yaranıb. 

Sfera.az-a açıqlama verən iqtisadçı-ekspert Günay Hüseynova qeyd edib ki, Azərbaycanın yüksək texnologiyalar sahəsində bəzi çatışmazlıqları mövcuddur.

Ekspert söylədi ki, Azərbaycanda yüksək texnologiyalar məhsullarının istehsalı mövcud olsa da, bu sahə hələlik lazımi istehsal imkanlarına sahib deyil. “Bəzi məhsulların istehsalı isə ümumiyyətlə həyata keçirilmir”, - deyən G.Hüseynova bildirib ki, bu səbəblərdən yüksək texnologiya sahəsində məhsulları əsasən idxal edirik. 

Ekspertin fikrincə, Azərbaycanın yüksək texnologiya məhsullarının istehsalını artırmaq üçün mütəxəssis çatışmazlığının aradan qaldırılması və müvafiq zavodların yaradılması vacibdir. 

Hazırda texnologiya dövründə yaşadığımızı qeyd edən ekspert, ölkəmizin Rusiya və Türkiyə kimi bazarlara meyvə və tərəvəz ixrac etmək əvəzinə, texnoloji avadanlıqlar ixrac etməsinin daha məqsədəuyğun olduğunu bildirib:

“Nəticə etibarilə, Azərbaycanın yüksək texnologiyalar sahəsindəki ticarət kəsirini azaltmaq və bu sahədə ixracı artırmaq üçün həm istehsalın, həm də mütəxəssis potensialının artırılması vacibdir. Bu, həm ölkənin iqtisadi inkişafına, həm də beynəlxalq bazarda mövqeyinin güclənməsinə töhfə verə bilər". 

Bəsti Rəfizadə