AZAL-ın səhvi sərnişinə ciddi zərər vurub - FOTO

Azərbaycan Hava Yolları (AZAL) şirkətinin xidmət göstərdiyi reys üzrə gecikmənin baş verməsi sərnişinlərə ciddi maddi zərər vurub. 

Sfera.az redaksiyasına müraciət edən sərnişin Kəmalə Qurbanova bildirib ki, 2025-ci ilin fevralın 17-də AZAL  tərəfindən təklif olunan uçuşla bağlı ciddi gecikmə yaşanıb. 

K.Qurbanovanın verdiyi məlumata əsasən, qeyd edilən tarixdə o, Azərbaycandan Türkiyəyə, oradan isə Fransayaya uçmalı idi. Şikayətçi bu uçuş üzrə gedişhaqqını öncədən tam ödədiyini də bildirib. 

Lakin uçuşun vaxtında baş tutmaması səbəbindən K.Qurbanova Türkiyədən Fransayaya uçan reysə çata bilməyib və bu səbəbdən əlavə xərcə düşüb: “Azərbaycandan Türkiyəyə olan uçuş saat 08:40-da başlamalı idi. Amma AZAL-da baş verən gecikmə səbəbindən təyyarə yalnız 1 saat sonra havaya qalxdı. Bu gecikmə nəticəsində Türkiyəyə çatdıqda Fransaya uçmalı olan təyyarə artıq yola düşmüşdü. AZAL-ın sərnişinləri gecikmə ilə çatdırdığından mən yenidən uçuş bileti almaq məcburiyyətində qaldım”. 

K.Qurbanova üzləşdiyi zərərlə bağlı AZAL rəhbərliyi ilə əlaqə saxlayıb. Ancaq AZAL-dan heç bir izahat verilməyib, səyahətçiyə köməklik göstərilməyib. K.Qurbanova bildirib ki, uçuşun gecikməsinə görə məsuliyyət AZAL-ın üzərində düşdüyü halda, ona heç bir kompensasiya təklif edilməyib. 
Sərnişin bu vəziyyətin düzəldilməsini və çəkdiyi maddi ziyanın geri ödənilməsini tələb edir. 

Bəsti Rəfizadə