Azərbaycan Respublikasının Prezidenti İlham Əliyev “Azərbaycan Dəmir Yolları” Qapalı Səhmdar Cəmiyyətinin yenidən təşkil olunması barədə fərman imzalayıb. Bu fərmanla, “Bakı Beynəlxalq Dəniz Ticarət Limanı” Qapalı Səhmdar Cəmiyyəti Azərbaycan Dəmir Yolları ilə birləşdiriləcək.

Maraqlıdır, bu dəyişiklik ölkə iqtisadiyyatına və nəqliyyat sisteminə necə təsir edəcək?

Mövzu ilə bağlı Sfera.az-a açıqlama verən iqtisadçı-ekspert Natiq Cəfərli logistik mərkəzə çevrilmək yolunda Azərbaycanın atdığı addımları diqqətə çatdırıb. Ekspert bildirib ki, dövlət tərəfindən böyük investisiya layihələri həyata keçirilib və ölkənin logistik mərkəzə çevrilməsi üçün mühüm işlər görülüb.

“Bir mərkəzdən idarə olunan logistik xətlər və yükdaşımaların eyni məntiqlə fəaliyyət göstərməsi bu işin effektivliyini artıracaq və Azərbaycanın beynəlxalq ticarət əlaqələrində daha güclü mövqe əldə etməsinə şərait yaradacaq. Bu, ölkəmizin logistik mərkəzə çevrilmək yolunda ciddi bir müsbət addım ola bilər,” – deyə N.Cəfərli qeyd edib.

O, həmçinin bildirib ki, koordinasiyalı fəaliyyətin təmin edilməsi bu layihələrin uğurlu olmasında əsas rol oynayır və bu cür mərkəzləşdirilmiş idarəetmə sisteminin tətbiqi Azərbaycanın daha səmərəli və inteqrasiya olunmuş nəqliyyat sisteminə sahib olmasına yardım edəcək.

Qeyd edək ki, fərman dəmiryol nəqliyyatı sahəsində nəqliyyat əməliyyatlarını və logistika proseslərini daha səmərəli və operativ qaydada həyata keçirmək, eləcə də dəniz nəqliyyatına olan ehtiyacların daha dolğun ödənilməsini təmin etmək məqsədilə imzalanıb.

Azərbaycan Respublikasının Nazirlər Kabineti və Azərbaycan Nəqliyyat və Kommunikasiya Holdinqi (AZCON)-a bu Fərmandan irəli gələn məsələləri həll etmək üçün 3 ay vaxt verilib.

Bəsti Rəfizadə

Dəmir Yolları və Dəniz Limanının Birləşdirilməsi iqtisadiyyata necə təsir edəcək? - AÇIQLAMA