Nəqliyyat və yükdaşıma sektorunda artım var - RƏQƏMLƏR
"Azərbaycanın nəqliyyat və yükdaşıma sektorunda son illərdə əhəmiyyətli artım müşahidə olunur".
Sfera.az xəbər verir ki, bunu İqtisadi və Sosial Araşdırmalara Yardım İctimai Birliyinin sədri, iqtisadçı-ekspert Eyyub Kərimli deyib.
Onun sözlərinə görə, ölkənin strateji coğrafi mövqeyi və nəqliyyat infrastrukturunun inkişafı bu sahədəki dinamikanı gücləndirir:
“Belə ki, 2023-cü ildə Avropa-Qafqaz-Asiya nəqliyyat dəhlizinin Azərbaycan hissəsində daşınmış yüklərin həcmi 51,420.6 min ton təşkil edib ki, bu da əvvəlki illə müqayisədə 29.8% artım deməkdir. Yük dövriyyəsi isə 12,648.9 milyon ton-km olub ki, bu da 31.9% artım göstərir.
2023 cü ildə daşınan yüklərin 54.4%-i (27,966.8 min ton) avtomobil nəqliyyatı ilə həyata keçirilib. Yüklərin 32.7%-i (16,841.2 min ton) dəmir yolu vasitəsilə, 12.9% (6,612.6 min ton) yük daşımaları isə dəniz nəqliyyatı ilə reallaşdırılıb”.
E.Kərimli qeyd edib ki, son illərdə beynəlxalq yükdaşımalar sahəsində də əhəmiyyətli artım qeydə alınıb:
“2021-ci ildə Azərbaycan şirkətləri üçüncü ölkələrin ərazisindən 13,979 daşıma həyata keçirmişdisə, 2023-cü ildə bu göstərici 42,627-yə yüksəlib. Bu dövrdə milli daşıyıcıların gəlirləri 340 milyon manatı ötüb”.
Ekspert sonda vurğulayıb ki, bu göstəricilər Azərbaycanın nəqliyyat və loqistika sektorunun dinamik inkişafını və beynəlxalq yükdaşımalar sahəsində artan rolunu əks etdirir.
Firuzə Əliyeva
