"Azərbaycan MDB+ regionunda ən yüksək likvidlik səviyyəsinə malik ölkədir" -“Fitch”
Azərbaycan MDB+ regionunda ən yüksək likvidlik səviyyələrindən birinə malikdir – 73 %, bu isə ölkənin güclü maliyyə sabitliyi ehtiyatına sahib olduğunu nümayiş etdirir.
Sfera.az bildirir ki, bu barədə "Fitch Ratings" beynəlxalq reytinq agentliyi məlumat yayıb.
Hesabata görə, region banklarının likvidliyi komfort səviyyədə qalır. 2022-ci ildə Ermənistan və Gürcüstanda qeyri-rezidentlərdən böyük həcmdə vəsait daxilolmalarından sonra depozit artımı yavaşlayıb. 2024-cü ilin sonuna isə regionun bank sektorunda kreditin depozitə nisbəti 100 %-ə çatıb.
”Fitch“ hesab edir ki, Gürcüstanda siyasi risklərə baxmayaraq, 2024-cü ildə bank likvidliyi sabit qalıb. Bu, sektorun dayanıqlılığı və xarici investorlar üçün daimi çıxış imkanları ilə izah olunur.
“Fitch Ratings” Azərbaycan, Ermənistan və Gürcüstanda bankların əsas göstəricilərinin tarixi səviyyədən yüksək qalacağını proqnozlaşdırır. Bununla belə, bu ölkələrdə reytinq trayektoriyası fərqli ola bilər.
Hesabata əsasən, regionda bankların kredit göstəriciləri son iki ildə sürətli iqtisadi artım və biznes həcmlərinin yüksəlməsindən faydalanmağa davam edir. Bu tendensiyalar əsasən Ukraynadakı hərbi münaqişənin dolayı təsirləri, Rusiya ilə ticarətin genişlənməsi, immiqrant axını və bununla bağlı maliyyə axınları, eləcə də yüksək xammal qiymətləri ilə əlaqələndirilir.
“Fitch” qeyd edir ki, Azərbaycanın bank sektoru əlverişli xarici iqtisadi konyunktura, xüsusilə neftin yüksək qiymətləri və keyfiyyətsiz aktivlərlə bağlı risklərin azalması ilə dəstəklənir.
“Azərbaycan və Ermənistan banklarının reytinq proqnozları 2023-2024-cü illərdə ardıcıl yüksəlişlərdən sonra əsasən stabildir. Gürcüstanın bank sektoru dayanıqlılığını qorusa da, siyasi risklərlə bağlı təzyiqlərlə üzləşir”, - deyə “Fitch” analitikləri bildiriblər.
Regional banklar 2022-2024-cü illərdə rekord gəlirlilik nümayiş etdirib. Kreditləşmənin sürətli artımı və böyük həcmdə dividend ödənişlərinə baxmayaraq, Azərbaycanın bank sektorunun kapitallaşmasının məqbul səviyyədə qalması kapitala müəyyən təzyiqlər yaradır. Bununla belə, “Fitch” sektorun yüksək gəlirliliyinin bu balansı qoruyacağını proqnozlaşdırır.
Müsbət dinamika, xüsusilə irsi risklərin əhəmiyyətli dərəcədə azaldığı Azərbaycanda nəzərə çarpır. Korporativ kreditlərin konsentrasiyasının və dollarlaşma səviyyəsinin azalması, manatla pərakəndə kreditləşmənin artması, mikrobiznesə və kiçik və orta sahibkarlığa fəal dəstək, eləcə də tənzimləyici nəzarətin gücləndirilməsi bu istiqamətdə mühüm rol oynayıb.
Pərakəndə kreditləşmənin genişlənməsi və milli valyutaların dayanıqlığı nəticəsində regionun bank sektorunda dedollarizasiya davam edir. Bununla belə, Gürcüstanda (kreditlərin 43 %-i) və Ermənistanda (33 %) dollarlaşma yüksək olaraq qalır ki, bu da həmin ölkələrin bankları üçün əsas risk faktorlarından biridir.
Gürcüstanda siyasi böhran dərinləşərsə, bank sektoru xüsusilə həssaslıq nümayiş etdirə bilər. Bu, investorların inamının azalmasına, ölkənin xarici likvidliyinə və mübadilə məzənnəsinə təzyiqə səbəb ola bilər. Fitch bu riskləri Gürcüstan banklarının reytinqi ilə bağlı mənfi proqnozlarında nəzərə alıb.
