Rəqəmsal depozitin hansı riskləri var? - İqtisadçı AÇIQLADI
Son dövrlərdə Azərbaycanda bank kartları ilə bağlı problemlər artmaqdadır. Kartlardan icazəsiz pul çıxarılması, mobil bank tətbiqlərinin işləməməsi, dələduzluq hallarının çoxalması və xidmət səviyyəsinin aşağı düşməsi əhali üçün ciddi narahatlıq yaradır. İnsanlar bank kartlarından istifadə zamanı müxtəlif problemlərlə qarşılaşır, dələduzluq sxemləri isə getdikcə daha da mürəkkəbləşir. Bu hadisələr fonunda tətbiq istifadəçiləri rəqəmsal depozitdən istifadədən də çəkinir.
Maraqlıdır, rəqəmsal depozitin hansı riskləri var?
Mövzu ilə bağlı Sfera.az-a açıqlama verən iqtisadçı Xalid Kərimli bildirib ki, tətbiqdən istifadə edərək banka getmədən əmanətin yerləşdirilməsində xüsusi bir risk yoxdur:
“Pulu cari hesabda, kartda saxlamaq və ya rəqəmsal əmanət qoymaq arasında heç bir fərq yoxdur. Rəqəmsal əmanəti yerləşdirmək üçün “SİMA” tətbiqidən təsdiq verilməlidir. Burada zəruri identifikasiya həyata keçirilir. Bundan başqa, elektron imza və ya ASAN İmza-dan istifadə olunur. Bu baxımdan rəqəmsal əmanətin yerləşdiirlməsi ilə bağlı heç bir risk yoxdur. İstifadəçilər rəqəmsal əmanətdən imtina etməməlidirlər. Əksinə, bu, onların vaxtına qənaətdir, hətta pulu cibdə daşımaqdan daha təhlükəsizdir. Bundan başqa, depozitdəki pullar dövlət tərəfindən sığortalanır”.
X.Kərimli qeyd etdi ki, kartla əməliyyatlarda, ümumiyyətlə, ehtiyatlı olmaq lazımdır:
“İstifadəçi kartda pul vəsaitlərinin köçürülməsi, məlumatların başqa birinə ötürülməsi və ya kartla internet üzərindən əməliyyatlar edərkən diqqətli olmalıdır. İnternet üzərindən edilən ödənişlərdə xüsusi məhdud balanslı debet kartından istifadə daha məqsədəuyğun olar. Maaş və ya əsas balansın toplandığı kartlar yox, sırf internet ödənişləri üçün ayrıca kartdan istifadə edilə bilər”.
Firuzə Əliyeva
