ABŞ-ni çalxalayan HƏBS - FED rəsmisi Çinə casusluq edirmiş
ABŞ-nin Federal Ehtiyatlar Sisteminin (FED) Rəhbərlər Şurasının keçmiş baş məsləhətçisi Con Harold Rodjers Çinin xeyrinə ticarət sirlərini oğurlamaqda ittiham olunaraq həbs edilib.
Sfera.az xarici mediaya istinadən xəbər verir ki, bununla bağlı məlumatı ABŞ Ədliyyə Nazirliyi açıqlayıb.
İqtisadiyyat elmləri doktoru olan Rodjers 2010-2021-ci illərdə FED-də baş məsləhətçi vəzifəsində çalışıb. Bu müddətdə o, Çinin kəşfiyyat və təhlükəsizlik xidmətləri ilə əməkdaşlıq edib.
Çin ABŞ-yə böyük miqdarda borc verib. Borcun ümumi məbləği 1 trilyon dollardan çoxdur. Ədliyyə Nazirliyi bildirir ki, Rodjersin çinli şərikləri ilə paylaşdığı məlumatlar Çinin ABŞ bazarını manipulyasiya etməsinə şərait yaratmaq imkanı verib. Açıqlamada vurğulanıb ki, Çin ABŞ-nin maliyyə siyasəti, o cümlədən faiz dərəcələri ilə bağlı qabaqcadan məlumatlı olub. Bu, Çinə ABŞ istiqraz və qiymətli kağızlarının alqı-satqısı zamanı mənfəət əldə etməsinə kömək edib.
Açıqlamada Rodjersin ən azı 2018-ci ildən başlayaraq FED-dəki vəzifəsindən istifadə etdiyi qeyd olunur. O, FED-in daxili qaydalarını pozaraq məlumatları elektron şəkildə şəxsi e-poçt hesabına köçürüb, Çinə getməzdən əvvəl cinayət ortaqları ilə görüşlərə hazırlaşıb.
Məlumatlardan aydın olur ki, Rodjers Çinə tez-tez səfərlər edib, orada mühazirələr oxuyub. Ehtimal olunur ki, FED rəsmisi bu səfərlər zamanı zəruri informasiyaları qarşı tərəfə ötürüb.
Açıqlamada Rodjersə 2023-cü ildə Çin universitetində yarımştat professor kimi çalışdığı üçün təqribən 450 min dollar ödənildiyi, keçmiş məsləhətçinin həssas məlumatlara çıxışı, bu məlumatların ötürülməsi və cinayət ortaqları ilə əlaqələri barədə yalan danışdığı qeyd edilib.
İndi Rodjersi 15 ilə qədər həbs cəzası və 5 milyon dollar cərimə gözləyir.
Vasif
