Rusiyada kartofun qiyməti insanları qəzəbləndirib - Prokurorluq İŞƏ QARIŞIB

Rusiyada ötən il kartofun qiyməti təxminən 92 faiz artıb. 

Sfera.az xəbər verir ki, bu haqda məlumatı Rusiyanın dövlət statistika qurumu (Rosstat) açıqlayıb. 

Kartof Rusiyada ən çox istehlak olunan tərəvəz məhsuludur. O digər tərəvəzlərlə və qida məhsulları ilə müqayisədə daha böyük sürətlə bahalaşıb. 
Ötən ay bir kiloqram kartofun orta qiyməti 56,9 rubl (təxminən 1 manat) təşkil edib. Təkcə noyabr ayında kartof 17,6 faiz bahalaşıb. 

 

Populyar məhsulun belə kəskin bahalaşması istehlakçıları o dərəcədə narahat edib ki, hətta bəzi şəxslər ölkənin Baş Prokurorluğina da müraciət ediblər. 
Rusiyalı analitiklər qeyd edir ki, Rusiyada kartofun 2 dəfəyə yaxın bahalaşmasının səbəbi 2022 və 2023-cü illərdə istehsalın kəskin artması ilə bağlıdır. 2023-cü ildə istehsal hətta son 30 ilin rekord səviyyəsinə çatıb. İstehsalın artması ilə əlaqədar bazarda bolluq yarandığından qiymətlər əvvəlcə 16 faiz, sonra 32 faiz enmişdi. 
Qiymətər aşağı olduğundan 2024-cü ildə kartof əkilən sahələr azaldılıb ki, bu da məhsul yığımına və bazardakı qiymətlərə təsir edib. 

 

Qeyd edək ki, Rusiya hər il Azərbaycandan da kartof alır. 2024-cü ilin yanvar-noyabr ayları ərzində Azərbaycandan Rusiyaya 42,5 min ton kartof ixrac olunub. 

 

Vasif