“Süni intellektin iqtisadi inkişafa təsirinin öyrənilməsi mühüm əhəmiyyət kəsb edir”.

Bunu Sfera.az-a açıqlamasında iqtisadçı deputat Tahir Mirkişili deyib.

O qeyd edib ki, iqtisadçılar bu barədə müxtəlif araşdırmalar aparırlar:

“Ümumi ortaq mövqelərdən biri ondan ibarətdir ki, süni intellekt inkişaf etməkdə olan ölkələr üçün iki yol yaradır. Onlar ya daha da zənginləşə, iqtisadiyyatlarının rəqabət qabiliyyətini gücləndirə ya da əksinə, həyat səviyyəsinə görə inkişaf etmiş ölkələrdən daha da geri qala bilərlər. Təhlillər onu göstərir ki, süni intellekt iqtisadiyyatın mühüm sektorları arasında geniş şəkildə tətbiq olunmasa, iqtisadi məhsuldarlığın artımına ümumi təsiri az olacaq. Əgər süni intellektin məhsuldarlığa təsiri yalnız yüksək ixtisaslı xidmətlər sektoru ilə məhdudlaşarsa, 100 ildən sonra qlobal real gəlir süni intellektsiz ola biləcəyindən cəmi 2,4% çox olacaq. Bununla belə, süni intellekt iqtisadiyyatı digər sektorlarında tətbiq olunarsa, o, yeni məhsulların və sənaye sahələrinin yaradılması üçün katalizator olmaq potensialına malik olacaq. Belə optimist proqnozda, süni intellekt qlobal iqtisadi artımın əsas hərəkətverici qüvvəsinə çevrilərsə, qlobal real iqtisadi gəlir 100 ildən sonra süni intellektsiz ola biləcəyindən 28% çox olacaq”.

Millət vəkili qeyd etdi ki, iqtisadiyyatın əksər sektorlarında süni intellekti sürətlə tətbiq edə bilən ölkələr, böyük ehtimalla, qlobal bazarlarda öz mövqelərini gücləndirəcəklər:

“İqtisadiyyatlarına süni intellektin inteqrasiyasını gecikdirən ölkələr isə inkişafın durğunluğunda qalmaq və innovasiyalardan faydalana bilməyərək həyat standartlarının aşağı düşməsi riski ilə üzləşəcəklər. Azərbaycanda da süni intellektin müxtəlif sahələrdə tətbiqi ilə bağlı müxtəlif araşdırmalar aparılır. Gecikmədən iqtisadiyyatın müxtəlif sektorlarında bu texnologiyaları tətbiq etməyi bacarsaq, gələcəyin innovasiyalarına mühüm çıxış əldə edə biləcəyik”.

Günay

"Süni intellekti iqtisadiyyata tətbiq edən ölkələr qlobal bazarlarda lider olacaqlar" - ŞƏRH