Qlobal bankdan neftin qiyməti ilə bağlı PROQNOZ: Yaxın aylarda...
ABŞ-nin Rusiyaya qarşı yeni sanksiyalar tətbiq etməsi neft qiymətlərinin bir müddət yüksəlməsinə səbəb olacaq.
Sfera.az dünyanın böyük investisiya banklarından olan “Goldman Sachs”in yeni proqnozuna istinadən xəbər verir ki, yaxın aylarda “Brent” markalı neftin dəyəri 85, hətta 90 dollara qədər yüksələcək.
“Goldman Sachs” analitiklərinin fikrincə, Rusiyanın neft hasilatında gözlənilən azalma qiymətlərin qalxmasına səbəb ola bilər. Həmçinin bildirilir ki, bu azalma İranın neft hasilatının azalması ilə üst-üstə düşərsə, qiymətlərin bir barel üçün 90 dollara qədər yüksəlmə ehtimalı var.
Xatırladaq ki, yanvarın 10-da ABŞ Prezidenti Co Bayden Rusiyanın neft və qaz gəlirlərini hədəf alan hərtərəfli sanksiyalar paketini açıqlayıb. Bu sanksiyaların ardınca “Brent” markalı neftin qiyməti bazar ertəsi səhər saatlarından etibarən 3%-dən çox artaraq 81 dolları keçib. “Goldman Sachs” sanksiyaların Rusiya ixracına təsir etməsindən sonra qlobal tədarükün azalmasının qiymətlərə yuxarı yönlü təzyiq göstərəcəyini bildirib.
Belə ki, yeni sanksiyalarla əlaqədar Rusiya neftini daşıyan gəmilərin sayı azalır. Təhlilçilər hesab edir ki, bu azalma nəticəsində əsas neft alıcıları olan Çin və Hindistan Yaxın Şərq, Afrika və Amerikadan daha çox neft almağa məcbur olacaqlar.
İnvestisiya bankı proqnozlaşdırır ki, yeni sanksiyaların da təsiri ilə 2025-ci ildə “Brent” neftinin bir barelinin qiyməti 70-85 dollar arasında qalacaq.
Vasif
Sfera.az
