SOCAR Türkiyədə iki şirkətini satdı - ADLAR

SOCAR Türkiyədə sahib olduğu “Bursagaz” və “Kayserigaz” qaz paylayıcı şirkətlərinin “Aksa Doğalgaz”a satışını tamamlayıb.

Sfera.az Türkiyə mediasına istinadən xəbər verir ki, “Bursagaz” və “Kayserigaz”ın satış prosesi tamamlandıqdan sonra həmin şirkətlər “Aksa Doğalgaz” "çətiri" altında xidmət göstərəcək.

Xatırladaq ki, SOCAR “Bursagaz” və “Kayserigaz”ı 2019-cu ildə almışdı. İki şirkət ümumilikdə 2 milyon abonentə təbii qaz paylama xidməti göstərir. Bu şirkətlərdən “Bursagaz” təxminən 1,2 milyon abunəçisi və 7000 kilometrdən çox qaz kəmərləri şəbəkəsi ilə Türkiyənin 4-cü ən böyük təbii qaz paylama şirkətidir. “Kayserigaz”ın isə kəmərlərinin uzunluğu 7 min kilometrdir və 700 min abunəçisi var.

“SOCAR Türkiye”nin icraçı direktoru Elçin İbadov bu satışla bağlı bildirib ki, təmsil etdiyi şitkət satış qərarını uzunmüddətli strateji hədəfləri istiqamətində qiymətləndirib:

“Bu günə qədər etdiyimiz təxminən 18,5 milyard dollar sərmayə ilə Türkiyənin ən böyük birbaşa xarici sərmayədarıyıq və bu strateji əhəmiyyətli investisiyalarla uzun illər Türkiyədə dəyər yaratmağa davam edəcəyik. Bir müddət əvvəl ictimaiyyətlə paylaşdığımız kimi, əsas işlərimizdən biri olan neft-kimya sektoruna diqqət yetirərək bu sahəyə əhəmiyyətli bir sərmayə qoymaq üçün mühəndislik işlərinə başladıq”.

Vasif

Sfera.az