Türkiyədə ötən il ən çox bahalaşan məhsullar – QİYMƏTLƏR

Türkiyədə ötən il ümumi inflyasiya 40 faizdən bir qədər yüksək olsa da bəzi məhsulların dəyərində dəfələrlə artım qeydə alınıb. 

Sfera.az Türkiyə mediasına isinadən xəbər verir ki, son bir ildə bahalaşma rekordu qeydə alınan məhsullar əsasən ərzaq malları olub.

Ən çox bahalaşma mərcidə qeydə alınıb. Mərcinin orta qiyməti 21 lirədən 99 lirəyə yüksəlib. İl ərzində mərci 4,71 dəfə bahalaşıb. 

Bahalaşma sürətinə görə ikinci sırada düyü dayanıb. Düyünün qiyməti 21 lirədən 90 lirəyə qalxıb. İl ərzində düyünün dəyəri 4,3 dəfə artıb. 

Qiyməti 4 dəfədən çox artan daha bir məhsul süddür. Südün litrinin qiyməti 11 lirədən 45 lirəyə yüksəlib. Bu məhsulda illik bahalaşma 4,1 dəfə olub. 
Makaron, pomidor, günəbaxan yağı və kartofun dəyəri 3 dəfədən çox artıb. Qiymətlər makaronlarda 11 lirədən 42 lirəyə (3,8 dəfə), pomidorlarda 22 lirədən 80 lirəyə (3,63 dəfə), günəbaxan yağlarında 36 lirədən 125 lirəyə (3,47 dəfə), kartoflarda isə 4 lirədən 13 lirəyə (3,25 dəfə ) yüksəlib. 

Dəfə ilə artım adıçəkilən məhsullardan başqa baş soğanda (2,87 dəfə), kərə yağında (2,71 dəfə), ağ pendirdə (2,31 dəfə), quru lobyada (2,1 dəfə) baş verib. 

Qeyd edək ki, Türkiyədə qiymət artımlarının əsas səbəbi kimi lirənin ucuzlaşması göstərilsə də son bir ildə məzənnədəki dəyişiklik adıçəkilən məhsulların qiymətindəki dəyişikliklə müqayisədə dəfələrlə az olub. 

Vasif