Rusiya 2024-cü ildə Avropaya boru kəməri qaz tədarükünü əvvəlki illə müqayisədə 14% artıraraq 32,1 milyard kubmetrə çatdırıb.

Sfera.az bu barədə Rusiyanın “Qazprom”a və Avropa Qaz Ötürmə Sistemləri Operatorları Şəbəkəsinin (ENTSOG) məlumatlarına əsasən xəbər verir.

Belə ki, 2023-cü ildə Rusiya boru kəməri ilə Avropaya qaz tədarükü təxminən 28,15 milyard kubmetr təşkil edib. Xüsusilə, Ukrayna vasitəsilə Qərbi və Mərkəzi Avropa ölkələrinə qaz nəqli 2024-cü ildə 15,4 milyard kubmetr təşkil edib ki, bu da əvvəlki illə müqayisədə altı faiz çoxdur.

“Türk axını” boru kəməri ilə cənub və cənub-şərqi Avropa ölkələrinə qaz nəqli 2024-cü ildə 23% artaraq 16,7 milyard kubmetrə çatıb. Təkcə 2024-cü ilin dekabrında bu marşrutla Rusiya qazının Avropaya ixracı noyabr ayı ilə müqayisədə 3 faiz artıb.

Bundan əlavə, Türkiyənin Enerji Bazarını Tənzimləmə Qurumunun məlumatına görə, 2024-cü ildə Rusiya boru kəməri ilə ölkəyə qaz tədarükü təqribən 20 milyard kubmetrə çata bilər. Yəni Rusiyanın Avropaya (Türkiyə də daxil olmaqla) illik boru kəməri qaz tədarükü təxminən 52 milyard kubmetrə çata bilər, 2023-cü ildə isə bu rəqəm 49 milyard olub.

Xatırladaq ki, yanvarın 1-də başa çatan Rusiya qazının Ukrayna ərazisindən tranziti ilə bağlı müqavilə hər il 40 milyard kubmetr Rusiya qazının Ukrayna ərazisindən nəqlini nəzərdə tuturdu. Lakin Kiyevin müqaviləni uzatmaqdan imtina etməsi Rusiyanın “Qazprom” şirkətini yanvarın 1-i səhər qaz tranzitini dayandırmağa məcbur edib. Rusiya Prezidenti Vladimir Putin daha əvvəl demişdi ki, Rusiya qazının tranziti ilə bağlı yeni müqavilə olmayacaq, çünki Yeni ilə bir neçə gün qalmış razılaşma əldə etmək mümkün deyil. Kiyev də öz növbəsində Rusiya qazının tranzitini dayandırmaq planlarını açıqlayıb.

Ukrayna Avropa Komissiyasının tələbi əsasında qazın “Rusiya” sayılmadığı müddətcə qaz tranzitini bərpa etməyə hazırdır, Rusiya prezidenti isə üçüncü tərəflərlə, yəni Türkiyə, Macarıstan, Slovakiya və Azərbaycan şirkətləri ilə müqavilələrin mümkünlüyünü qeyd edib.

Firuzə Əliyeva

Sfera.az

Rusiyanın Avropaya qaz nəqli ARTIB - RƏQƏMLƏR