Türkiyə Suriyanın neft-qaz bazarına girir - İki ölkənin sistemləri birləşdiriləcək

Türkiyə Suriyada neft və təbii qaz hasilatının artırılmasına, ixracın genişləndirilməsinə kömək etmək istədiyini bildirib.

Sfera.az “Bloomberg”ə istinadən xəbər verir ki, bu, Ankaranın müharibədən zərər çəkən ölkənin yenidən qurulmasında daha böyük rol oynaması istiqamətində son addımdır.

Türkiyənin energetika naziri Alparslan Bayraktar bu həftə bildirib ki, Türkiyə hakimiyyəti ölkənin infrastrukturuna ziyan vuran on ildən çox davam edən münaqişədən sonra Suriyanın enerji ehtiyacını ödəmək yolları üzərində işləyir.

“Biz, həmçinin Suriyanın bərpası üçün xam neft və təbii qazdan istifadə imkanlarını araşdırırıq. Biz tərəfdaşlarımıza bu istiqamətdə necə töhfə verə biləcəyimizi söyləməyi planlaşdırırıq”, - Bayraktar bildirib.

Bayraktar bildirib ki, uzunmüddətli əməkdaşlıq Suriyanı Türkiyənin ixrac terminallarına birləşdirən yeni neft və qaz kəmərlərinin yaradılmasına gətirib çıxara bilər. Türkiyənin hesablamalarına görə, Suriyada hazırkı neft hasilatı səviyyəsi gündə təxminən 30 min barel səviyyəsində qiymətləndirilir ki, bu da təxminən iyirmi il əvvəl görülən səviyyələrin 5%-i qədərindədir.

Ekspertlər Suriyada gündəlik neft hasilatının bir neçə dəfə artırılması imkanlarının olduğunu düşünürlər.

Vasif

Sfera.az