Gələn ilin büdcəsi rekord səviyyəyə çatacaq - Müqayisə

2025-ci ildə Azərbaycanın müstəqillik tarixinin ən böyük ikinci dövlət büdcəsi icra ediləcək. Gələn ilin büdcənin gəlirləri 38 milyard 356 milyon manat, xərcləri isə 41 milyard 407,6 milyon manat olacaq. ABŞ dolları ilə ifadə etdikdə, gələn ilin büdcə xərcləri 24,357 milyard dollar təşkil edəcək.

Sfera.az xatırladır ki, ABŞ dolları ilə ifadədə indiyə qədər ən böyük büdcə xərci 2013-cü ildə icra edilib. Həmin ildə dövlət büdcəsinin xərcləri 24 milyard 405 milyon dollar olub. On iki ildən sonra büdcənin xərcləri yenidən həmin səviyyəyə çatdırılacaq.

2014-cü ildən başlayaraq Azərbaycanın dövlət büdcəsinin xərclər hissəsində azalma baş verib. Büdcənin xərcləri 2014-cü ildə 23,851 milyard dollara, 2015-ci ildə 18,248 milyard dollara enmişdi. 2015-ci ildəki 2 böyük devalvasiyadan və ardınca 2016-cı ildə üzən məzənnə rejimində manatın bir qədər də ucuzlaşmasından sonra dövlət büdcəsinin xərcləri ABŞ dolları ilə ifadədə bir qədər də kiçilib.

Dövlət büdcəsinin xərclər hissəsi 2016-cı ildə 11,123 milyard dollara, 2017-ci ildə 10,22 milyard dollara düşdü.

Xərclərdə artım 2018-ci ildən yenidən yüksəliş mərhələsinə keçib. Həmin ildə xərclər 13,37 milyard dollara, 2022-ci ildə 18,05 milyard dollara, 2023-cü ildə 20,73 milyard dollara yüksəlib. 2024-cü ildə xərclərin 23,35 milyard dollar olacağı proqnozlaşdırılıb.

Müqayisədən görünür ki, 2025-ci ilin büdcə xərclərinin məbləği 2013-cü ildəki həddə çatacaq. Lakin nəzərə alsaq ki, gələn il büdcədə dəyişiklik edilərək xərclərin artırılması ehtimalı da var, bu halda gələn il dövlət büdcəsinin xərclərində Azərbaycanın müstəqillik tarixinin ən böyük büdcəsi icra edilə bilər.

Vasif

Sfera.az