Azərbaycanda qoyun və keçi sayı sürətlə AZALIR - 5 ilin statistikası
Azərbaycanda son 5 ildə qoyun və keçi sayı 1 milyon başdan çox azalıb.
Sfera.az rəsmi dövlət statistikasına əsasən xəbər verir ki, ölkəmizdə 2020-ci ildə 8,31 milyon baş qoyun və keçi olduğu halda, 2024-cü ilin oktyabrında onların sayı 7 milyon başa düşüb.
Son 5 ildə qoyun və keçi sayında 1,31 milyon baş, yəni 15,7 faiz azalma baş verib. Yalnız son 1 ildə qoyun və keçi sayı 220 min başa yaxın azalıb.
Azərbaycanda qoyun və keçi sayının azalması bu heyvan əti ilə yerli istehsal hesabına təminatı pisləşdirib. Bir neçə il əvvələ qədər yerli istehsal hesabına qoyun və keçi ilə özümüzü 100 faiz təmin edirdiksə, hazırda bu göstərici 95 faizdən də aşağı düşüb. Buna görə də ölkəmiz hər il xaricdən qoyun və keçi idxalını artırır.
Beş il əvvəl 2400 ton qoyun və keçi əti idxal edən ölkəmiz indi 5 min tona yaxın qoyun və keçi əti alır.
Vasif
Sfera.az
