Azərbaycan əhalisi daha çox nə ilə məşğul olur? - STATİSTİKA

Azərbaycan əhalisinin daha çox hissəsi kənd təsərrüfatı ilə məşğul olur.

Sfera.az rəsmi dövlət statistikasına istinadən xəbər verir ki, 2023-cü ildə məşğul əhalinin sayı 4 milyon 963 min nəfər olub. Onların 35,8 faizi, yəni 1 milyon 777 min nəfəri kənd təsərrüfatında çalışır.

Kənd təsərrüfatı məşğulluğun təmin edilməsi baxımından digər sahələrdən kəskin fərqlənir. Başqa heç bir sahədə bu qədər və ya buna yaxın sayda insan məşğul olmur. Məşğul əhalinin 14,3 faizi (707 min nəfər) ticarət, nəqliyyat vasitələrinin təmiri sahələrində çalışır.

Təhsil sahəsi də məşğulluğun təmin edilməsində önəmli paya sahibdir. Bu sahədə məşğul əhalinin 7,6 faizi (376 min nəfər) fəaliyyət göstərir.

Emal sənayesi (285 min nəfər), dövlət idarəetməsi və müdafiə; sosial təminat (231 min nəfər), nəqliyyat və anbar təsərrüfatı (203 min nəfər), əhaliyə səhiyyə və sosial xidmətlərin göstərilməsi (190 min nəfər) sahələrində də məşğulluq göstəricisi yüksəkdir.

Ümumilikdə, məşğul əhalinin 78,6 faizi qeyri-dövlət, 21,4 faizi dövlət sektorunda fəaliyyət göstərir. Bundan başqa, məşğul əhalinin çox hissəsi qeyri neft-qaz sektorunda işləyir.

Vasif

Sfera.az